An deiz kentañ
Un toullad devezhioù a-raok ma vez lakaet un timbr e gwerzh gant melestradurezh ar Postoù e vez aozet un eztaol evit brudañ an timbr hag ar pezh a zo da c'houzout gantañ. Anvet eo an degouezh “Deiz kentañ an timbr”.
.jpg)
Evit an deiz-se ez eus bet fardet ur golo-lizher o kinnig, war an tu-kleiz, ur skeudenn damheñvel ouzh an timbr, gant titouroù evit displegañ eus petra zo kaoz, hag ar meneg Deiz kentañ (First Day Cover e saozneg). Ar skeudenn a c’hell bezañ lufrus, bosek, gwriet zoken. Alies e saver ur gartenn-bost ivez, pe ur follenn-nij a vent vras skeudennaouet kaer. Ur siell ispisial, dezhi un dresadenn stilizet, an deiziad hag ar gerioù “Deiz Kentañ” a zo implijet evit kachediñ an timbr peget war ar c’holoenn.
Pep hini zo libr da zegas ur golo-lizher frank da vezañ kachedet an timbr avat.
An degouezh, savet war un ton bras gant ar velestradurezh e-pad un deiz pe zaou, a c’hoarvez en ul lec’h dibabet evit bezañ e darempred gant elfenn an timbr : ur savadur istorel, kêr ganedigezh un den brudet, tachenn un emgann istorel… Gant sikour ur gevredigezh dimbrawourien eus ar vro e vez savet un diskouezadeg timbroù an deiz-se, eviit desachañ tud ar muiañ ar gwellañ.
An dafar-mañ a vez klasket gant an dastumerien, ha priziet e vez ar goloennoù-lizher ha ar c’hartennoù-post gant ur siell Deiz Kentañ er rann “First Day Cover” ar c’hatalogoù. Rouez kenañ eo an timbroù a voe implijet a-raok an Deiz Kentañ, lakaet er-maez goude ul laeroñsi pe gant tud dizonest pe implijidi ar postoù berrboell. Ma lenner mat deiz ar siell war ar golo e c’hellfe bezañ ker ruz he friz.
