Aogust Bôcher

Aogust Bôcher^[1] (François Louis Auguste Bôcher pe Bocher, pe Boscher pe Bôscher er skridoù ofisiel)^[2], Ar Yeodet e anv-barzh, a oa skrivagner brezhonek, barzh, kazetenner hag ezel eus Goursez Breizh.

Ganet e oa bet e Duaod d'ar 7 a viz Kerzu 1878 ha marvet e oa e Sant-Servez-Kallag d'an 22 a viz Ebrel 1944. Tremen a reas e vugaleaj e Ploulec'h, ha diwar anv ur gêriadenn vrudet eno, ar Yeoded, e tapas e anv-pluenn.

Degemeret e voe da ezel er C'hoursez e 1905. Kenlabourat a reas gant Erwan ar Moal, da gentañ war-dro ar gelaouenn Kroaz ar Vretoned ha diwezhatoc'h war-dro Breiz. E-pad ar Brezel-bed Kentañ, pa oa war an talbenn, e skrivas bemdez e Notennou brezel hag a veze embannet bep sizhun gant Kroaz ar Vretoned. A-hed e vuhez e labouras evit ar brezhoneg ha kenlabourat a reas gant meur a gelaouenn vrezhonek : barzhonegoù savet gantañ a gaver e-barzh meur a hini anezho, Ar Vro, kelaouenn Taldir, Kloc'hdi Breiz, Feiz ha Breiz, Dihunamb, Arvor... koulz hag e-barzh kelaouennoù gallek a embanne tammoù skridoù e brezhoneg, evel Le Pays Breton.

Mervel a reas e Sant-Servez, e kanton Kallag lazhadeget gant paotred eus ar Rezistañs pa oa c'hwec'h vloaz ha tri-ugent.

Skridoù

Bleuniou Yaouankiz gwerziou ha zoniou bet kurunet, kalz ané, gant Kevredigez Broadus Breiz hag an "Association artistique et littéraire de Bretagne". Montroulez, Lajat, 1909
Notennoù brezel, Mouladurioù Hor Yezh, 1989
Bleuniou yaouankiz II / Auguste Bocher "Ar Yeodet" ; biographie d'Auguste Bocher par sa fille Yvonne Bocher, Celtics chadenn, 2003, (Collection Brittia : devoir de mémoire). ISBN 2-84722-027-5

Liammoù diavaez

Sellet er Wikimammenn : Aogust Bôcher.

Aogust Bocher war Data BNF

Notennoù ha daveennoù

↑ «Atav eo bet skrivet e anv Bôcher gant ar Yeoded. Bez' ez eus [sic], evit gwiriañ kement-se, testeni e zornskridoù ha testeni ar sinadurioù lakaet, hervez al lezenn, war ar skouerennoù eus ar gazetenn ma oa rener anezhi, L'Indépendance bretonne, hag a veze kaset d'ar Prefektur» Gwendal Denez, rakskrid da Notennoù Brezel Aogust Bôcher, Mouladurioù Hor Yezh, 1989, p.9.
↑ Ibid.

[1] «Atav eo bet skrivet e anv Bôcher gant ar Yeoded. Bez' ez eus [sic], evit gwiriañ kement-se, testeni e zornskridoù ha testeni ar sinadurioù lakaet, hervez al lezenn, war ar skouerennoù eus ar gazetenn ma oa rener anezhi, L'Indépendance bretonne, hag a veze kaset d'ar Prefektur» Gwendal Denez, rakskrid da Notennoù Brezel Aogust Bôcher, Mouladurioù Hor Yezh, 1989, p.9.

[2] Ibid.

[1]

[2]