Ceint
Ceint eo an anv a reer eus ar rouantelezh vrezhon martezeüs lec'hiet e kontelezh Kent a vremañ. Hervez Nennius e voe roet e 450 d'ar roue sakson Hengist gant Vortigern a c'hoantae eurediñ e verc'h.
Gwrangon a vije bet roue eno. N'eo ket gwall fizius Nennius avat, ha Gwrangon, war a seblant, a oa un nobl eus rouantelezh Gwent.
Ar pezh a zo sur eo e oa ar rannvro damani ar bobl Cantiaci a-arok an aloubidigezh roman ha gwirheñvel eo e oa ur rouantelezh etre disparti ar Romaned ha donedigezh ar Saksoned. Ne badas ket pell avat. Ar rannvro gentañ da vezañ dalc'het gant ar Saksoned goude o emsavidigezh e voe hervez Nennius. Hervezañ e emgannas ar Vrezhoned ouzh ar Saksoned en Aegelesthrep e 455, Crecganford e 456 ha Wippedesfleot e 465. Dont a rejont a-benn d'o faezhañ, war a seblant, met ne c'helljont o c'has kuit eus Preden ha gouestl e voe ar roue sakson Hengist da adkavout e c'halloud, dre drubardiezh, ma kreder Nennius (gwelet Klemm ar Vrezhoned). Ar darvoudoù-se a c'hellfe bezañ mojennel pe zamvojennel.
Rouantelezh Kent eo an hini a voe savet gant ar Saksoned goude e Ceint.
An arkeologiezh a ziskouez, avat, ne oa niverus ar saksoned nemet war an aod, eus genou an Tavoez betek Dover. Ar bezioù pagan a ziouer e diabarzh ar vro ha war an aod su. An dra-se a c'hellfe talvezout e chomas kornioù-bro dindan kontrol ar Vrezhoned betek hanterenn gentañ ar VIvet kantved. Posupl eo e oa kristen un darn vrasoc'h eus ar Saksoned eget ma kredfed, avat.
Gwelet ivez kemmañ
Daveoù kemmañ
- Britain and the End of the Roman Empire, Ken Dark, Tempus, London, 2002, ISBN 0752425323
Gwelout ivez : Ar Gelted • Ogham • Yezhoù keltiek • Rouantelezhioù brezhon • Enez Vreizh • Galia