Deportivo de La Coruña
Ar Real Club Deportivo de La Coruña a zo ur c'hlub mell-droad eus kêr A Coruña e Galiza hag a voe krouet e 1906. E-kerzh ar bloavezhioù 2000 e voe lesanvet ar SuperDepor a-drugarez da disoc'hoù mat: gant ar gourdoner Javier Irureta e-penn ar skipailh e voe gounezet al Liga e 2000 ha kib Spagn evit an eil gwezh e 2002. Pemp gwezh diouzh renk e kemeras perzh ar re glas ha gwenn e Champions League adalek 2001 en ur vont ur wezh betek an hanter-c'hourfennoù ha div wezh betek ar c'hardgourfennoù. Er mare-se e veze gwelet e stad Riazor unan eus ar skipailhoù efedusañ e Europa gant ur c'hevelerezh a c'hoarierien skiant-prenet ganto (ar c'habiten Fran, ar Vraziliz Mauro Silva ha Djalminha, an difenner Noureddine Naybet...) hag a c'hoarierien a ziougan mat evel Roy Makaay, Diego Tristán, Juan Carlos Valerón pe c'hoazh Joan Capdevila... E 2006 ne zeuas ket a-benn A Coruña da vezañ perzheget evit Kib Europa: gant c'hoarierien wellañ ar c'hlub o vont kuit pe war o vont war o leve e krogas e disoc'hoù da vezañ falloc'h-fallañ, betek memes diskenn en eil rummad goude bezañ echuet en 18vet renk al Liga e 2011. Er Segunda División e adkavo an Depor e enebour a C'haliza Celta de Vigo evit ar bloavezh 2011-2012. Kabiten ar skipailh eo Manuel Pablo a c'hoari er c'hlub abaoe 1998.
Stad
kemmañ
Liammoù
kemmañ- (es) Lec'hienn ofisiel