Catharina Charlotta De la Gardie
Catharina Charlotta Taube, pe Catharina Charlotta De la Gardie, pe De la Gardie (1723–1763), zo ur gontez hag un harozez svedat. Herzel a reas ar prosez diwezhañ graet en abeg d'ar sorserezh e Sveden.
He buhez kemmañ
Merc'h e oa d'ar c'hont Edvard Didrik Taube av Odenkat, ha da Kristina Maria Falkenberg. He c'hoar e oa Hedvig Ulrika Taube (1714-1744), a voe serc'h da roue Sveden .
En 1744, pa oa 21 bloaz, e teuas da vout dimezell a enor ar briñsez Lovisa Ulrika (1720-1782), ur verc'h da roue Prusia, deuet da vout rouanez Sveden. Dimeziñ a eure en 1748 d'ar c'hont Pontus Fredrik De la Gardie, ur jeneral svedat, breur d'ar gontez skiantourez Eva Ekeblad.
Brec'h kemmañ
E 1756 e voe kroget da vaksinañ an dud ouzh ar vrec'h e Sveden, ha kalz tud a oa savet a-enep an nevezenti-se. Catharina Charlotta a reas vaksinañ he bugale, ha kement-se a lakeas kalz a gouerien d'ober evelti. A-wechoù e komzer eus an darvoud-se evel deroù ar vaksinañ a-vras.
Sorserezh kemmañ
An eil taol kaer ganti a c'hoarvezas e 1758.
En 1757 e oa trelatet an dud e parrez Ål, en Dalarna, abalamour d'un afer sorserezh, ha trizek maouez ha pemp gwaz a oa bet tamallet dezhe temtiñ bugale ha kas anezhe d'ur sabad sorserezed. Ar gouarnour Pehr Ekman a roas urzh d'o herzel, d'o goulennata, d'o jahinañ . Catharina Charlotta De la Gardie a glevas anv eus ar prosez e-pad ur veaj da broviñs Dalarna en 1758, ha neuze, a-gevred gant tud all, e roas bec'h da herzel ar prosez dre ober brud en-dro dezhañ e Stockholm. Betek neuze ne oa nemet un afer lec'hel, etre daouarn ar gouarnour hag an Iliz er broviñs, met adalek ma voe anavezet er vro e teuas da vezañ ur vezh. Ar Breujoù a c'houlennas un enklask, dieubet e voe an holl damallidi, hag ar Gouarnour Ekman, en devoa degemeret an tamalloù a sorserezh hagen devoa aotreet ar jahibnerezh, a voe torret eus e garg ha kondaonet d'ar vac'h.
De la Gardie a sikouras gouzañvidi an afer, reiñ dezho avokidi, ha goulenn dic'haou digant ar stad, rak gant an abadennoù jahinañ e oa bet brevet o c'horfoù haneoant ket evit labourat ken. Abalamour da se e teuas da vout un harozez, e voe roet ur vedalenn dezhi e 1761, ma oa skrivet : Catharina Charlotta Taube, comitissa De la Gardie, Fulcrum infelicibus, Ob XII ab injuria servatos cives Ordo R. Equ. 1761.
Karantez kemmañ
Mignonez e oa d'ar varzhez Hedvig Charlotta Nordenflycht. Brudet eo barzhoneg Nordenflycht, anvet Öfver en Hyacint, diwar-benn karantez ar varzhez ouzh Johan Fischerström; en he barzhoneg diwezhañ ez eus anv eus un tric'horn ar garantez etre Nordenflycht, Fischerström ha Catharina Charlotta De la Gardie, er goañvezh 1762-63.
Mervel a reas Catharina Charlotta goude tapout ur gwallgleñved oc'h ober war-dro ar re glañv.