Filippo Iañ Parma

Fulup Bourbon, pe Fulup Iañ Parma, pe Felipe (e spagnoleg), pe Filippo di Parma (en italianeg), ganet e Madrid (Spagn) e 1720 ha marvet en Alessandria (Italia) e 1765, a oa ur priñs spagnol, Infant Spagn, hag a voe lakaet da zug Parma. Gantañ e voe krouet skourr Bourboned Parma.

Filippo Iañ Parma, infant Spagn, dug Parma

E vuhez

Mab e oa da Felipe V, roue Spagn, ha d'e eil pried, ar briñsez italian Elisabetta Farnese.

E miz Eost 1739 e voe dimezet, dre hanterouriezh, d'ar briñsez c'hall Elesbed Bro-C'hall (1727-1759), 12 vloaz anezhi, ha seizh vloaz yaouankoc'h egetañ, ur verc'h d'ar roue gall Loeiz XV ha d'e bried polonat Maria Leszczyńska.

E vreur Carlos, pe Carlo en italianeg, en doa renet en e raok e Parma eus 1731 da 1735.

Bugale

Tri bugel en doe:

• Isabella Maria Luisa Antonietta Ferdinanda Giuseppina Saveria Domenica Giovanna (1741–1763), a voe dimezet d'an impalaer santel, Joseph II, breur henañ ar rouanez Marie-Antoinette Bro-C'hall, hag a varvas da 22 vloaz.
• Ferdinando Maria Filippo Lodovico Sebastiano Francesco Giacomo (1751–1802), Dug Parma war-lerc'h e dad, adal 1765 hag a zimezas d'an Arc'hdugez Maria Amalia Aostria, c'hoar-gaer d'e c'hoar henañ, ha bugale o doe.
• Luisa Maria Teresa Anna (1751–1819), anavezet evel Maria Luisa, dimezet d'an Infant Carlos, kenderv dezhi, a renas evel Carlos IV, ma teuas da vout Rouanez Spagn.