Roberto Torres (kaner)

Roberto Torres, ganet d'an 10 a viz C'hwevrer 1940 e Güines e Kuba, lesanvet El Caminante, zo ur c'haner kuban, aet da chom da SUA. Bet eo e-touez kanerien al laz Sonora Matancera e 1969. Brudet eo evel kaner ar ganaouenn Caballo Viejo savet gant Simón Díaz. Perzh a gemeras er film Son, la antesala de la salsa, diwar-benn istor ar Son cubano, gant Arturo Sandoval, Rosendo Rosell, Celia Cruz hag Eloy Crespo.

Roberto Torres e 2011

D'e 16 vloaz, e 1956, e stagas da ganañ e meur a laz, Conjunto Universal de Malena del Sur hag Orquesta Swing Casino en o zouez. Evel kalz arzourien e kuitaas an enez e 1959 abalamour da drec'h an Dispac'h kuban. Mont a reas da gêr Miami hag ac'hane da New York ma reas e annez. Eno neuze e savas ar Charanga Broadway e 1962 gant ar fleütour kuban Eddy Zervigón hag e vreudeur Rudy ha Kelvin, ha gante e reas eizh albom, etre 1964 ha 1968.

E 1969 ez eas da ganañ er Sonora Matancera, al laz brudetañ e Kuba d'an ampoent, evel lazkaner, ha gante e chomas tri bloaz met n'en devoe ket tro da vout pennganer. War un dro e sonas gant al laz José Antonio Fajardo.
E 1972 ec'h enrollas ur bladenn gant al laz Latin Dimension, dindan Mike Martínez, evel pennganer.

E kreiz ar bloavezhioù 1980 e savas La Charanga Vallenata da seniñ sonerezh vallenata.

E Miami emañ Roberto Torres o chom hiziv.

Liamm diavaez kemmañ

Buhezskrid
Kanaouennoù