Urraca Zamora

Ur pennad Urraca zo ivez.

Urraca de Zamora pe Urraca Fernandez (León, 1033 - León, 1101). a oa infantez Rouantelezh León.

Urraca de Zamora, skeudenn embannet er gelaouenn Zamora Ilustrado, e 1882.

Merc'h e oa da Fernando Iañ León "o Grande" ou "O Magno" (c. 1016 - 27 a viz Kerzu 1065) ha d'e bried Sancha Iañ León (1016 - 7 a viz Du 1067).

Pa varvas he zad e tegouezhas dezhi kêr Zamora hag an trowardroioù.

Hêrezh

A-raok da Fernando mervel e rannas e rouantelezhioù etre e bemp bugel:

• da Alfonso e roas Rouantelezh León;
• da Sancho e roas Rouantelezh Kastilha;
• d'e vabig Garcia, Rouantelezh Galiza;
• da Elvira, kêr Toro;
• da Urraca, kêr Zamora.

Kartenn bolitikel eus hanternoz Ledenez Iberia war-dro 1065 ma weler Rouantelezh Galiza, Rouantelezh León, ha Rouantelezh Kastilha.

Zamora

Pan eas Urraca da chom da Zamora, ec'h annezas kastell Zamora, pevar zour outañ; en tour a zo bet miret emañ ar Museo Baltasar Lobo hiziv.

Maeronez armoù Rodrigo Díaz de Vivar, ar Cid Campeador, e oa Urraca pa voe anvet da varc'heg war-dro ar bloaz 1060 en iliz Santiago de los Caballeros de Zamora. C'hoar gwellañ karet Alfonso e oa hag e skoazellañ a reas da adc'hounit e rouantelezh ha da c'houarn e vro goude.

Aloubadeg

Pa varvas Fernando Iañ León e oa drouklaouen-bras e vab henañ Sancho gant an doare ma oa rannet madoù e dad, ma tisklerias brezel d'e vreudeur ha c'hoarezed. Un den brezelgar e oa, evel a voe gwelet buan e Kastilha gant Brezel an Tri Sancho. Diwezhatoc'h e reas brezel d'e vreur Alfonso VI, ha goude e reas emglev gant e vreur Alfonso da vont da aloubiñ rouantelezh Galiza o breur García, er bloaz 1071. An infantez Urraca hepken a zalc'has penn a-drek mogerioù Zamora, d'he breur Sancho II, rak aet e oa Alfonso da repuiñ e taifa Toledo, a voe kemeret gantañ diwezhatoc'h. Sancho II a lakaas seziz war Zamora. Seizh miz e padas met kreñv e oa ar mogerioù ha ne voe ket kemeret gant ar roue. Se zo kaoz e larer eus Zamora eo «la Bien Cercada».