Yezhoù oil

Ar yezhoù oil (langues d'oïl e galleg) zo un hollad yezhoù, pe rannyezhoù, romanek, kar d'ar galleg, hag a ya d'ober ar pezh a anver ur c'h-"continuum" rannyezhoù komzet e hanternoz Bro-C'hall, e kreisteiz Belgia, hag un tammig ivez e kornôg Suis. Emañ ar yezhoù oil e kerentiad ar yezhoù romanek.

Kartenn eus ar yezhoù oil

Gant ar yezhoniourien e vez rannet ar yezhoù romanek komzet e Bro-C'hall e tri skourr bras : ar yezhoù oil, ar yezhoù oc pe okitaneg, hag ar rannyezhoù frankoprovañsek pe arpitaneg.

Rannet eo bet domani ar yezhoù oil e meur a dachenn vras gant ar yezhoniourien. Pa dremener eus an eil tachenn d'eben e c'hall ar yezherien en em gompren, met etre tachennoù hag a zo pell an eil diouzh eben, n'eus ket a gomprenezon ken.

Tachenn an hanternoz (levezon frankek)

• pikardeg
• walloneg
• loreneg
• normaneg an hanternoz, komzet en hanternoz d'al linenn Joret, gant parlantoù an inizi angl-ha-norman (jerzenezeg, gwernenezeg, sarkeg, aldernezeg)
• champagneg

Tachenn ar c'hreiz

• galleg standard
• parlant bro Orleañs
• parlant Touren
• parlant Berry
• parlant Bourbonez

Tachenn ar reter (levezon burgondek)

• Bourguignon
• Franc-Comtois

Tachenn ar c'hornôg

• normaneg ar c'hreisteiz
• parlant Perche
• parlant Maine
• parlant Anjev
• gallaoueg

Tachenn ar mervent

• poateveg
• santonjeg (alies e vezont bodet en un hollad poateveg-santonjeg).

Peuzvarv eo ar rannyezhoù a veze komzet en tachennoù tost da Bariz (Orléanais, Champagn...). Bev a-walc'h eo avat ar pikardeg, ar walloneg, ar poateveg hag ar santonjeg...