Donetsk
Donetsk (en ukraineg: Донецьк, distaget [doˈnɛt͡sʲk], treuzlizhennet Donets’k; e rusianeg: Доне́цк, distaget [dɐˈnʲet͡sk] ha treuzlizherennet Donetsk) a zo ur gêr c'hreantel vras eus reter Ukraina, war lez ar C'halmius, ha kreizenn ha kêr vrasañ an tolead anvet Donbas e-lec'h m'eo kreñv an eztennañ glaou-douar hag ijinerezh an dir. En tu-hont da 982 000 a dud a zo o chom e kêr (2010), hag en tolead-kêr ez eus en tu-hont da 2 vilion a dud o vevañ (2011).
Istor kemmañ
Savet eo bet kêr e 1869 gant ur C'hembread, John Hughes, ha setu perak e oa bet anvet "Youzovka" (Юзовка) da gentañ ("Youz" o vezañ distagadur "Hughes" er vro), hag un toullad brav a Gembreiz a zeuas d’en em staliañ eno, dreist-holl eus Merthyr Tudful. Divadezet e voe e 1920 hag anvet "Stalino" en enor da Stalin, ha divadezet c'hoazh ur wech e 1961 evit dont da vezañ "Donetsk".
