Miquel Obiols

Miquel Obiols Prat zo ur skrivagner katalanek evit ar yaouankiz, ganet e Roda de Ter e proviñs Barcelona en 1945.

Nebeud a levrioù en deus skrivet, e-skoaz skrivagnerien all, abalamour ma'z eo un oberour arnodel e pep hini eus e skridoù.

Labourat a ra a-wechoù evit ar skinwel, ha kenlabouret en deus bet gant TVE ha Canal + Spagn.

Arnodoù

E-barzh El misterio de Buster Keaton e c'hoari gant ar frammoù-danevelliñ, o krouiñ testennoù diechu ha kaligramoù.
E Datrebil. Siete cuentos y un espejo, kontet da vezañ unan eus kant gwellañ oberenn an XXvet kantved e Spagn, hervez ar Fundación Germán Sánchez Ruipérez, e kaver ur pennad-skrid moulet war an tu gin ha n'haller lenn nemet dirak ur melezour, ha testennoù en dizurzh a rank al lenner adsevel;
El libro de las M'Alicias, skeudennaouet gant Miguel Calatayud, zo un arnod iskis ha fentus da adskrivañ istor Alis e Bro ar Marzhoù.

Darn eus e oberennoù zo bet leurennet evit ar c'hoariva, evel A l'inrevés, leurennet gant Dagoll Dagom ha deuet da vout Nit de Sant Joan.