Philippe Katerine

Philippe Katerine

Philippe Blanchard, pe Philippe Katerine diouzh e anv arzour, a oa bet ganet e Thouars (Deux-Sèvres) d'an 8 a viz Kerzu 1968. Evel kaner eo bet anavezet da gentañ gant ur stil dibar dezhañ, abalamour d'an testennoù dreist-holl, ma tiskouez bezañ trelatet, enkrezet, droch ha farsus war un dro. Pa veze liv ar bossa nova gant e oberennoù kentañ en deus aozet muioc'h-mui a ganaouennoù rock hag elektro. E 2006 e tapas brud gant ar ganaouenn Louxor hag an diskan anezhi : « Et je coupe le son..., et je remets le son ! ». Un aktour eo Philippe Katerine ivez : rolloù bras pe vrasoc'h en deus c'hoariet, evel da skouer e Gainsbourg, vie héroïque e 2010 pe Le Grand Bain e 2019. E 2024 e oa bet gwelet en un daolenn eus lid-zigeriñ ar C'hoarioù olimpek e Pariz.