Timbroù an Inizi Karolina
Inizi Karolina a vez graet eus un enezeg lec’hiet e kornog ar Meurvor Habask, e biz Ginea-Nevez.
Trevadenn Spagn eo an “Islas Carolinas” adalek 1886, goude m’eo bet diskoulmet gant ar Pab Leon XIII an tabut etre ar vro-se hag Alamagn war c’houlenn aotrouniezh war an inizi.
Koulskoude, da heul ar brezel etre Spagn hag ar Stadoù-Unanet e tiviz Rouantelezh Alfonso XIII gwerzhañ an enezeg d’an Alamagn e 1899 evit 25 million a besetas. Gant an Alamanted ez eus lakaet war droad ur servij postel war an tiriad gwarezet (“Schutzgebiet“) adanvet Karolinen ganto. An timbroù alaman soulgarget a vez implijet da gentañ, hag e kaver e gwerzh e 1901 timbroù boaz trevadennoù Alamagn, da lavaret eo ar vag “Hohenzollern” gant ar meneg KAROLINEN.
Aloubet eo an enezeg gant ar Japaniz d’an 8 a viz Here 1914. Gant Kevredigezh ar Broadoù eo aotreet ez-ofisiel ar Japan e 1920 da verañ an Inizi Karolina. Kement-se a vo graet gantañ betek ma vo skarzhet gant an Amerikaned e dibenn an Eil Brezel-bed (1944). Timbroù Japan zo re an inizi e-pad ar prantad 1914-1944.
Fiziet eo an inizi e melestradurezh Stadoù-Unanet Amerika gant Aozadur ar Broadoù Unanet e miz Gouere 1947, gant statud ur rann eus an “Trust Territory of the Pacific Islands” (Tiriad Fiziet Inizi ar Mor Habask). Timbroù Stadoù-Unanet Amerika zo implijet etre 1944 ha 1983.
Dre ar c'houlennadeg aozet e 1979 e tibab ar strobad inizi Palau bezañ dizalc’h, pezh a yelo da wir d'ar 1añ a viz Genver 1981. Anvet eo Republik Palau bremañ.
E 1983 eo ar peurrest eus an enezeg a sav Stad Kevredadel Mikronezia.