Bruce Willis

Bruce Willis (Walter Bruce Willis) a zo un aktour hag ur produour filmoù amerikan bet ganet d'an 19 a viz Meurzh 1955 e diazezlec'h Idar-Oberstein (Alamagn).

Bruce Willis e 2006

Deuet e oa da vezañ brudet er bloavezhioù 1980, dreist-holl a-drugarez d'e berzh evel haroz (John McClane) ar rummad filmoù Die Hard. Brudet eo ivez evit e berzh e filmoù all evel Armageddon, Pulp Fiction, Unbreakable ha Sin City. Bet eo bet dimezet gant an aktourez amerikan Demi Moore.

Willis eo ar seizhvet aktour amerikan paeet ar gwellañ. Meur a briz en deus gounezet ivez : Emmy Award, Golden Globe Award pe c'hoazh Saturn Award. Asambles gant Sylvester Stallone hag Arnold Schwarzenegger en deus krouet Planet Hollywood.

E vuhez

Familh Willis a guitaas Alamagn e 1957, hag en em stalias e Penns Grove (Pennsylvania). Mont a reas Bruce Willis da Benns Grove High School, hag eno en doe digarez da ziskouez e varregezhioù evel aktour. Dre forzh c'hoari war al leurenn e teuas a-benn ivez d'en em zizober diouzh e gaketerezh. Goude bezañ bet er skol e labouras evel gward. Labourat a reas ivez evit DuPont e Deepwater (New Jersey). Dilezel a reas ar vicher goude ma voe bet lazhet unan eus e genlabourerien, ha stagañ a reas da evañ. Deskiñ seniñ harmonika a reas ivez hag e kemeras perzh en ur strollad R&B anvet Loose Goose. E-pad ur pennad e voe enklasker prevez.

Distreiñ a reas d'ar vicher aktour hag e heulias kentelioù e Montclare State University. Goude-se ez eas da New York. Eno e labouras e West Bank Cafe. Meur a wech en em ginnigas evit c'hoari e filmoù, hag a-benn ar fin e voe degemeret evit perzhioù bihan en heuliad skinwel Miami Vice, hag en ur film bruderezh evit Levi's. Kuitaat a reas New York, hag ez eas da Galifornia. Dibabet e voe evit c'hoari en heuliad skinwel Moonlighting (1985-1989) e-touez tri c'hant aktour all. Berzh a reas an heuliadenn ha kinniget e voe da Willis labourat evit ar merk evajoù Seagram.

Dindan daou vloaz e tastumas Willis etre pemp ha seizh milion dollar, met chom a reas hep kenderc'hel gant ar bruderezh-se pa zivizas chom a-sav gant an evañ, e 1988. E 1987 e c'hoarias er film Blind Date (savet gant Blake Edwards), gant aktourien all evel Kim Basinger. Brudet da vat e teuas da vezañ a-drugarez d'e berzh e Die Hard (1988). Kement a verzh a reas ar film ken voe savet tri film all da heul. Er bloavezhioù-se ivez ec'h enrollas ur bladenn sonerezh blues anvet The Return of Bruno. C'hoari a reas e meur a film e penn-kentañ ar bloavezhioù 1990 (Striking Distance, The Bonfire of the Vanities) met ne rejont ket kalz berzh. Adalek 1994 e reas berzh en-dro a-drugarez da filmoù evel Pulp Fiction, Twelve Monkeys (1995) pe c'hoazh The Fifth Element (1997). C'hoari a reas e filmoù all, met ne rejont ket kalz berzh, war-bouez Armageddon (1998). Berzh a reas en-dro er film The Sixth Sense (1999). Ur perzh bihan en doe ivez en heuliad skinwel Friends. Nac'hañ a reas c'hoari e Ocean's Eleven (2001) dre ma felle dezhañ enrollañ ur bladenn, ur perzh bihan en doe memes tra e Ocean's Twelve (2004). E 2005 e c'hoarias e Sin City, hag e 2007 e Planet Terror.

Bruce Willis da zevezh skignadenn gentañ Live Free or Die Hard, miz Even 2007

Filmoù sinema

• 1980 : The First Deadly Sin
• 1982 : The Verdict
• 1985 : A Guru Comes
• 1987 : Blind Date
• 1988 : The Return of Bruno, Sunset, Die Hard
• 1989 : That's Adequate, In Country, Look Who's Talking
• 1990 : Die Hard 2, Look Who's Talking Too,

The Bonfire of the Vanities

• 1991 : Mortal Thoughts, Hudson Hawk, Billy Bathgate, The Last Boy Scout
• 1992 : The Player, Death Becomes Her
• 1993 : Loaded Weapon 1, Striking Distance
• 1994 : North, Color of Night, Pulp Fiction, Nobody's Fool
• 1995 : Die Hard with a Vengeance, Four Rooms, Twelve Monkeys
• 1996 : Last Man Standing, Beavis and Butt-Head Do America
• 1997 : The Fifth Element, The Jackal
• 1998 : Mercury Rising, Armageddon, The Siege * 1999 : Franky Goes to Hollywood, Breakfast of Champions, The Sixth Sense, The Story of Us
• 2000 : The Whole Nine Yards, The Kid, Unbreakable
• 2001 : Bandits
• 2002 : Hart's War, Grand Champion
• 2003 : Tears of the Sun, Rugrats Go Wild!, Charlie's Angels: Full Throttle
• 2004 : The Whole Ten Yards, Ocean's Twelve
• 2005 : Hostage, Sin City
• 2006 : Alpha Dog, 16 Blocks, Fast Food Nation, Lucky Number Slevin, Over The Hedge
• 2007 : The Astronaut Farmer, Perfect Stranger, Grindhouse, Nancy Drew, Live Free or Die Hard
• 2008 : What Just Happened, Assassination of a High School President, The Lost Eagles
• 2009 : The Surrogates

Filmoù ha heuliadoù skinwel

• 1984 : Miami Vice, e pennad No Exit
• 1985 : The Twilight Zone, e pennad Shatterday
• 1985-1989 : Moonlighting, 67 pennad
• 1996-1997 : Bruno the Kid
• 1997 : Mad About You, e pennad The birth part 2
• 1999 : Ally McBeal, e pennad Love Unlimited
• 2000 : Friends, e-barzh tri fennad
• 2002 : True West
• 2005 : That '70s Show, e pennad Misfire

Evel produour

• 1988 : Sunset
• 2002 : The Crocodile Hunter: Collision Course
• 2007 : The Hip Hop Project, Live Free or Die Hard

Pladennaoueg

• Return of Bruno, 1987, Razor & Tie
• If It Don't Kill You, It Just Makes You Stronger, 1989, Motown / Pgd
• Classic Bruce Willis: The Universal Masters Collection, 2001, Polygram Int'l

Prizioù

Steredenn Bruce Willis war Hollywood Walk of Fame

• Emmy ("Outstanding Lead Actor in a Drama Series") ha Golden Globe evit e berzh en heuliad Moonlighting
• Blockbuster Entertainment Award ("Favorite Actor - Suspense") ha People's Choice Awards ("Favorite Motion Picture Star in a Drama") evit e berzh er film The Sixth Sense. War ar roll e oa ivez evit gounit Saturn Award (aktor gwellañ). Div wech war roll MTV Movie Awards ivez.
• E miz C'hwevrer 2002 e resevas Hasty Pudding Man of the Year digant Harvard's Hasty Pudding Theatricals. Er memes bloavezh e voe lakaet da vouezh aotreet vroadel Children in Foster Care
• E miz Ebrel 2006 e voe bet lakaet da Officier Dans L'ordre Des Arts Et Des Lettres e Frañs
• D'ar 16 a viz Here 2006 e voe staliet steredenn Bruce Willis e Hollywood Walk of Fame. E 6915, Hollywood Boulevard emañ ar steredenn.