Ezrelegenn

Emañ an ezrelegennoù da vezañ enebet ouzh ar relegennoù diabarzh.

Ezrelegenn

Iskevrennad eus	skeledenn
Enebet ouzh	endoskeleton

Ezrelegennoù naturel

Un ezrelegenn (pe amskeledenn, pe eksoskeledenn) zo ur perzh anatomek diavaez hag a harp hag a warez korf ul loen. Graet e vez krogen hag a-wezhioù relegenn diavaez anezhañ. Razh an arthropoded (evel an amprevaned, ar c'hresteneged hag ar c'hevnid) ha kalz divellkeineged, evel ar blotviled krogennek o deus un ezrelegenn.

Ne servij ket ezrelegenn an amprevaned evel un hobregon evit en em zifenn hepken met ivez evel ur gorread a dalvez da stagañ ar c'higennoù, evel ur skoilh a-enep an disec'hadur hag evel ur benveg santidik ouzh an endro.

Setu amañ da-heul roll ar seurtoù ezrelegennoù a c'haller da gavout gant un nebeud skouerioù.

• Askorn ha migorn
  • Kregin baot
• Kitin

  

  Penn ur verienenn

  • Arthropoded : graet e vez skleritoù eus ar pladennoù.
• Graet gant Kalkiom
  • Koural
  • Echinodermata
  • Blotviled
  • Lod eus ar Polychaetae
• danvez-Kailhastr
  • Diatomeed
  • Radiolariae

Gwelet ivez ar pennad muz

Ezrelegennoù savet gant Mab-den

An ezrelegenn ardaouel zo un ostilh savet dreist-holl evit bezañ implijet gant an dud en emgannoù, evit sevel tiez peotramant evit bevañ e endroioù dañjerus.

Diwanet e oa keal an ezrelegennoù en unan eus levrioù ar sindikad Stratemeyerm, Tom Swift, Jr. and His Jetmarine sinet gant Victor Appleton II ha brudet e oa bet gant ur romant eus ar skrivagner skiant-faltazi Robert A. Heinlein anvet Starship Troopers. Dibaoe eo bet implijet ingal e romantoù, bannoù-treset ha tresadennoù-bev, e Bro-Japan peurgetket.

Hiziv an deiz ez eo bet tost adtapet ar skiant-faltazi gant ar skiant a-drugarez da araokadennoù an deknologiezh. Emeur o ren enklaskoù skiantel da sevel ezskeledennoù bevmekanek evit o implijout er greanterezh pe evit ar vezegiezh pe an arme. Koulskoude e chom kudennoù da zifuilhañ evit pezh a sell ouzh ar reoliñ, ar c'halloudegezh hag an elfennoù lusker (kigennoù an ezrelegenn). Daoust ma'z eus bet savet kentpatromoù ezkeledennoù hag a labour c'hoazh e tioueront, da skouer, an tizh ha kenurzh ar fiñvoù zo rekis evit bezañ gouest da gevezañ gant soudarded n'o deus ket seurt harnez.

Imbourc'hioù a-vremañ

Ajañs ar Raktresoù Imbourc’h evit an Difenn er Stadoù-Unanet (United States Defense Advanced Research Projects Agency) hag aozadurioù all o deus klasket sevel ezrelegennoù abaoe meur a zeg vloaz. Nebeut a araokadennoù zo bet neoazh hag en em c'houlenn a reer c'hoazh petore talvoudegezh en deus seurt ardivink (n’eus hini ebet anezhe a vije aet pelloc’h evit stad ar c’hentpatrom betek-henn).

Labourat a ra ar pep brasañ eus ar c’hentpatromoù gant ur reizhiad hag a gerzh dre zour hag a zo reolet gant un urzhiataer. Gallout a reont bezañ lakaet da gerzhet gant batirioù, ur c’heflusker dre loskadur diabarzh pe gant piloù dre helosk.

Unan eus an implijoù pennañ a vefe reiñ an tu d’ar soudarded da zougen pouezioù bras (80-300 Kg) en ur redek pe en ur sevel gant diri. Gallout a rafe ivez bezañ implijet evit prederiañ ar re glañv, an dud mac’hagnet peurgetket. Abalamour d’an niver brasoc’h-brasañ a dud kozh a rankont intent oute ha d’an diouer a dud a vicher, meur a bare ijinourien japanat o deus krouet ezrelegennoù savet evit skoazell ar c’hlañvdiourezed da zibradañ ha da zougen ar glañvourien. Gallout a rafer ober gant an ezrelegennoù ivez evit ober war-dro an dud o deus bet ur barrad empenn. A-drugarez dezhe e vefe ezhomm nebeutoc'h a dud war-dro ar glañvourien ar muiañ mac'hagnet pa vez ezhomm meur a arbennigour bremañ. Ingaloc'h e vefe embregerezh an holl glañvourien ha dre se e vefe aesoc'h dielfennañ anezhañ war-lerc'h ha reizhañ anezhañ diouzh pep c'hlañvour goude se. un nebeud raktresoù zo hiziv an deiz evit krouiñ ezrelegennoù savet a-ratopzh evit ar c'hreizennoù addeskerezh evel an ezrelegenn LOPES pe LOKOMAT.

Liammoù diavaez

• (en) Filmoù, skeudennoù ha pennadoù diwar-benn un ezrelegenn evit an dud