Mor Jawa

(Adkaset eus Mor Java)
Pelec'h emañ mor Jawa

Mor Jawa pe Mor Java (Laut Jawa en indonezeg) zo ur mor bihan war harzoù Meurvor Indez hag ar Meurvor Habask, a c'holo ur gorread a 310 000 km2.

Stummet e oa bet da vare ar skornerezh diwezhañ pa savas kondon ar morioù. Bas a-walc'h eo ar mor-se (67 metr d'ar muiañ).

En em astenn a ra etre inizi Borneo en norzh, Jawa er su, Sumatera er c'hornôg ha Sulawesi er reter. Dre strizh-mor Karimata etre Sumatera ha Borneo, er gwalarn, emañ e darempred gant Mor Sina ar Su; dre strizh-mor Sunda etre Sumatrra ha Jawa, er gevred, eo liammet ouzh Meurvor Indez; dre strizh-mor Makassar etre Borneo ha Sulawesi, en norzh, emañ e darempred gant Mor Sulawesi. Er reter da Vor Jawa emañ Mor Flores, hag er gevred emañ Mor Bali.

Bras eo pouez ar pesketaerezh e Mor Jawa rak gwall beskedus eo. Meur a bark natur zo bet savet en arvor, evel en enezeg Karimunjawa, hag e-leizh a douristed a zeu di da arvestiñ ouzh ar vuhez dindan vor (koural, spoue...).

Etre miz C'hwevrer ha miz Meurzh 1942 e c'hoarvezas eno Emgann Mor Jawa, unan eus an emgannoù taerañ war vor e-pad an Eil Brezel-bed. Distrujet e voe listri eus an Izelvroioù, ar Rouantelezh Unanet, Aostralia ha Stadoù Unanet Amerika gant morlu Japan a oa o tagañ Jawa.