Porzh a-steud

Ar porzh a-steud a zo ur porzh enankañ/ec'hankañ a ro an tu d'an urzhiataer da gehentiñ gant e amva. Ur c'hetal eo ar porzh a-steud. Ar porzhioù a-steud a oa eus ar re gentañ o kevaraezañ an urzhiataerioù da eskemmañ stlennoù gant an diavaez. Anvet e vezont RS232 pa eo anv ar reolad e reont meneg dioutañ da arc'hwelañ.

An termen "a-steud" a dalvez kement hag e vez ar stlennoù oc'h amredek gant un neudenn nemetken eleze e vez ar bitoù o vezañ kaset an eil re da heul ar re all.

Da gentañ e veze tu nemet kas roadennoù ha tremen hep degemer anezhe pa ne oa ket daouank an treuzkas. Bremañ e vez daouank porzhioù a-steud an ijinennoù arnevez. Neuze o deus ezhomm div neudenn ar porzhioù daouank da zont a-benn da gehentiñ.

Arc'hwelañ ar porzh a-steud

N'eus ket ezhomm a arhent goubredañ (un eurier) da gas stlennoù pa vez ec'houbred ar c'hehentiñ. Da lavaret eo e vez an esaouenn amzer etre daou nod kenheuilh o vezañ diforzh. Hogen e rank ar paker bezañ en araez da ziforc'hiñ an nodoù (un hed a eizh bit en deus un nod) e-touez an heuliad bitoù e vez kaset dezhañ.

Setu perak e vez lakaet e penn pep nod kaset gant un hevelep kehentiñ ur bit spesadel anvet bit START hag unan da verkañ dibenn an nod anvet bit STOP. Pezh a c'heller adverkañ eo e vez dispignet 20% eus ar bann drafet gant ar bitoù-se (evit 10 bit kaset, nemet 8 arveret d'enbonegañ an nod ha 2 evit diogelañ ar bakadenn).

Ar c'hennaskerioù a-steud

Ar c'hennaskerioù arveret gant ar porzh a-steud a vez anvet DB9 ha DB25. Ar c'hennaskerioù-mañ o deus 9 broch evit an hini kentañ ha 25 broch evit an eil. Peurvuiañ e vezont kenstaget gant ar bennwal ha marc'het ouzh talbenn a-dreñv an urzhiataer.