Chapel Sant-Dren

Chapel Sant Dren zo ur savadur bras a-walc'h eus ar XVI^vet kantved e Plougastell-Daoulaz. Emañ 5 km e mervent ar vourc'h, e deun an Aberloc'h (Lauberlac'h), war glann dehou ar wazh.

Chapel Sant Dren

Mont a ra un nev hag ur groazell d'ober anezhañ. Stumm dorn ur baner zo gant an nor e talbenn ar c'hornôg, gant ur wareg damblaen-begek eus an azginivelezh a-us dezhi. A-zioc'h an nor ez eus un enskrivadur a zispleg e oa savet ar chapel d'an eil sulvezh a viz Mae e 1549 gant Herri a Gastell (Kastell-Paol?), person Plougastell, en enor da Intron-Varia Goñfort ha da Sant Adrian. Kemer a reas ar chapel-se lec'h unan koshoc'h rak danevell a ra ur skrid eus ar 27 a viz Kerzu 1414 e oa roet 5 lur leve da Abati Daoulaz gant Marc'harid Burel diwar douaroù hag a oa etre chapel sant-dren ha Plougastell. Un tour bihan oa bet savet e fin ar marevezh gotek.

Hervez lod, patrom ar chapel a vefe Sant Adrian a brezegas ar feiz katolik e Breizh-Veur hag a varvas e 720. Seblantout a ra e vefe gouestlet ar chapel d'ur sant merzher kentoc'h. Da lâret eo Sant Adrian, merzher e Nikomedia war-dro 303. Brudet e oa er Grennamzer, evel Sant Bastian ha Sant Anton, da wareziñ an dud diouzh ar c'hleñvedoù pegus. Marteze en dije kemeret lec'h Sant Derien, keneil da Sant Neventer, evel patrom ar chapel.

E-leizh a zelwennoù a dalvoudegezh a zo er chapel-se : Sant Erwan etre ar paour hag ar pinvidig en ur c'hustod koad eus ar XVII^vet kantved, un delwenn eus ar Werc'hez vamm (XVI^vet), eus Santez Ana (XVI^vet), eus Sant Adrian (XVI^vet), eus Sant Marzhin, Sant Alar, Sant Fransez Asiz, ha re all ... E korn biz talbenn ar chapell e weler un aerouant el laez

Ur c'halvar bet savet e 1594 a zo e kichen ar chapel. Diblaset e oa bet e 1940.