Kongo (stêr)
Gwelit ivez ar bajenn disheñvelout Kongo
Ar stêr Kongo eo ar stêr vrasañ a zo e Kreiz Afrika, gant 4 700 km hed dezhi. An eil stêr hirañ eus Afrika eo, goude an Nil. Evit ar c'has ez eo ar C'hongo an eil stêr er bed, goude ar stêr Amazon. E ziazad, an eil diazad brasañ er bed ivez goude hini an Amazon (hag a-raok hini ar Mississippi), zo goloet gant ur goadeg vras.
Anv ar stêr zo bet roet da ziv stad, Republik Kongo ha Republik Demokratel Kongo, koulz ha da Rouantelezh Kongo gwechall.
Bez' e c'haller bageal war ul lodenn vat eus ar C'hongo ha lod eus hec'h adstêrioù. Bageal a c'haller etre an aber ha Matadi, ur 150 km bennak diouzh ar mor. Eno ez eus lammoù-dour (lammoù-dour Livingstone) a vir ouzh ar bigi da vont betek al lenn Malebo (pe lenn Stanley), etre Kinshasa ha Brazzaville. Adalek al lenn-se betek Kisangani ez eus un tamm all hag a c'haller bageal warnañ, an hini hirañ-holl. Abaoe amzer an trevadennoù ez eus linennoù hent-houarn da liammañ al lodennoù bageadus etrezo (da skouer, etre Matadi ha Kinshasa pe etre Kisangani hag Ubundu) ha gallout a reer evel-se kas marc'hadourezh penn-da-benn ar stêr.
