Mario Nascimbene

Mario Nascimbene, bet ganet d'an 28 a viz Du 1913 e Milano hag aet da Anaon e Roma d'ar 6 a viz Genver 2002, a oa ur sonaozour ha penn laz-seniñ italian.

E Conservatorio di Musica «Giuseppe Verdi» (Milano) eo e teskas sonaozañ ha ren ul laz-seniñ, digant Ildebrando Pizzetti peurgetket. Ran e oa gant ar sinema ha kerkent ha 1941 en devoe tro da lakaat e varregezhioù e pleustr o kempenn sonerezh ar film L'amore canta savet gant Ferdinando Maria Poggioli. Da-heul e kenlabouras gant filmaozourien vrudet-mat evel Giuseppe De Santis, Carlo Lizzani, Georg Wilhelm Pabst, Francesco Rosi, Roberto Rossellini ha dreist-holl Valerio Zurlini.

Par da Nino Rota hag Armando Trovajoli en Italia e voe Nascimbene e-touez pennañ nevezerien e-keñver ar sonerezh film war-lerc'h an Eil Brezel-bed, bet kempennet ouzhpenn tri c'hant film gantañ. Kentañ sonaozour italian an hini eo a voe pedet da labourat war filmoù meur er Stadoù-Unanet : The Barefoot Contessa (1954) ha The Quiet American (1958) gant Joseph L. Mankiewicz, Alexander the Great (1956) gant Robert Rossen, The Vikings (1958) gant Richard Fleischer ha Solomon and Sheba (1959) gant King Vidor.

Kemmet don en devoa Mario Nascimbene an doare da enrollañ ar sonioù er sinema italian, dreist-holl gant e ijinadenn Mixerama, ur seurt mekanik d'o standilhonañ. Ganti e oa e-tailh da grouiñ kenaozadurioù liesseurt diwar sonerezh, trouzioù naturel (glav, avel, hag all), trouzioù degaset gant an dud (mouezhioù, kirri, kirri-nij, hag all) ha trouzioù diwar faltazi. E-barzh Roma ore 11 gant Giuseppe De Santis (1952) e reas gant trouz ur skriverez. Da geñver Il processo de Verona gant Carlo Lizzani (1963) e klever trouz teir mindrailherez o tennañ mesket gant ar sonerezh. Trouz un douzerez-leton an hini eo en devoa implijet evit One Million Years B.C. gant Don Chaffey (1966).

E 1991 e voe deroet priz David di Donatello alla carriera da vMario Nascimbene gant Accademia del Cinema Italiano a-benn dougen bri d'e vicher dibar ; Mario Cecchi Gori hag Alida Valli a voe an daou loread all.

Un nebeud filmoù en devoa kempennet ar sonerezh anezho

L'amore canta gant Ferdinando Maria Poggioli (1941)
Margherita fra i tre gant Ivo Perilli (1942)
Se io fossi onesto gant Carlo Ludovico Bragaglia (1942)
La Dame de l'Ouest gant Carl Koch (1942)
Incontro con Laura gant Carlo Alberto Felice (1945)
Amor non ho... però... però gant Giorgio Bianchi (1951)
È l'amor che mi rovina gant Mario Soldati (1951)
O.K. Nerone gant Mario Soldati (1951)
Roma ore 11 gant Giuseppe De Santis (1952)
L'amore in città gant Michelangelo Antonioni, Federico Fellini, Alberto Lattuada, Carlo Lizzani, Francesco Maselli, Dino Risi ha Cesare Zavattini (1953)
The Barefoot Contessa gant Joseph L. Mankiewicz (1954)
Alexander the Great gant Robert Rossen (1956)
Uomini e lupi gant Giuseppe De Santis ha Franco Ferrara (1956)
A Farewell to Arms gant Charles Vidor (1957)
The Quiet American gant Joseph L. Mankiewicz (1958)
The Vikings gant Richard Fleischer (1958)
Room at the Top gant Jack Clayton (1959)
Solomon and Sheba gant King Vidor (1959)
Estate Violenta gant Valerio Zurlini (1959)
Cartagine in fiamme gant Carmine Gallone (1960)
Scent of Mystery gant Jack Cardiff (1960)
Sons and Lovers gant Jack Cardiff (1960)
Francis of Assisi gant Michael Curtiz (1961)
Barabbas gant Richard Fleischer (1961)
Jessica gant Jean Negulesco (1962)
Il processo de Verona gant Carlo Lizzani (1963)
One Million Years B.C. gant Don Chaffey (1966)
Doctor Faustus gant Richard Burton ha Nevill Coghill (1967)
The Vengeance of She gant Cliff Owen (1968)
The Night of Counting the Years gant Shadi Abdel Salam (1969)
When Dinosaurs Ruled the Earth gant Val Guest (1970)
Creatures the World Forgot gant Don Chaffey (1971)
La prima notte di quiete gant Valerio Zurlini (1972)
Anno uno gant Roberto Rossellini (1974)
Il messia gant Roberto Rossellini (1975)