Me zo ganet e-kreiz ar mor

Me zo ganet e kreiz ar mor zo gwerzenn gentañ ur varzhoneg skivet gant Yann-Bêr Kalloc'h (Bleimor), bet ganet e 1888 ha marvet abalamour d'ur strinkad obuz e 1917 war talbenn ar Brezel Bed Kentañ.

Eil rann ar varzhoneg Pédenn én Téoélded eo Me zo ganet e kreiz ar mor, unnek poz enni. E gwenedeg eo bet savet, evel holl oberennoù ar barzh.

Un ton evit he c'hanañ zo bet savet e 1942 gant Jef ar Penven, ar pezh en deus degaset brud d'ar varzhoneg ha d'ar sonaozer war un dro. Diwar neuze eo bet kanet gant kalz arzourien.

Ar varzhoneg

Unnek poz zo e Me zo ganet e kreiz ar mor, a c'heller lenn en dastumad Ar en deulin. Setu amañ an tri foz kentañ evel m'o lenner en dastumad, evel ma voent moullet war ar follenn sonerezh orin e 1942 hag evel ma vijent bet skrivet e KLT.

Ar en deulin	Jef ar Pelven	KLT
Me zo ganet é kreiz er mor Tèr lèu ér mez ; Un tiig gwenn duhont em-es, Er benal 'gresk étal en nor Hag el lann e hol en anvez. Me zo ganet é kreiz er mor, E bro Arvor	Me zo gañnet é kreiz er mor Tèr lèu ér mez ; Un tiig guen du-hont em ès, Er benal 'gresk é-tal en nor Hag el lann e hol en anvez, Me zo gañnet é kreiz er mor E bro Arvor	Me zo ganet e-kreiz ar mor Teir lev er-maez ; Un tiig gwenn du-hont am eus, Ar balan 'gresk e-tal an nor Hag al lann a c'holo an anvez, Me zo ganet e-kreiz ar mor E bro Arvor
Me zad e oé, èl é dadeu, Ur martelod ; Béùet en-dès kuh ha diglod Er peur ne gan dén é glodeu Bamdé-bamnoz ar er mor blod. Me zad e oé, èl é dadeu, Stleijour-rouédeu.	Me zad e oé, èl é dadeu Ur Martolod ; Béúet hen dès kuh ha diglot Er peur ne gañn dén é glodeu Bamdé-bamnoz ar er mor blot Me zad e oé, èl é dadeu, Stleijour rouédeu.	Va zad a oa, evel e dadoù Ur martolod ; Bevet en deus kuzh ha diglod Ar paour ne gan den e glodou Bemdez-bemnoz war ar mor blot Va zad a oa, evel e dadoù, Stlejer rouedoù.
Me mamm eùé e laboura Ha gwenn hé bleù Geti, er hwéz ar on taleu, Disket em-es bihannig tra, Médein ha tennein avaleu. Me mamm eùé e laboura D'hounid bara...	Me mamm eùé e laboura Ha guen hé bleù Geti, en huéz ar on taleu, Disket em ès, bihannik tra, Médein ha teñnein avaleu, Me mamm eùé e laboura D'hounid bara.	Ma mamm ivez a laboure Ha gwenn he blev Ganti ar c'hwez war hon taloù, Desket em eus, bihanik tra, Mediñ ha tennañ avaloù. Ma mamm ivez a labour D'hounit bara.

Displegañ a ra ar barzh pelec'h e oa ganet, en enez Groe. Martolod eo e dad evel e dadoù a-raok dezhañ. Ar mab hag e vamm a labour er parkoù da c'hounit o zamm bara. Embann a ra da zantez Varia emañ o eurvad en un arc'h, aet da gousket "er vered parrez". Aner eo e zaeroù avat. Ret eo "bout kreñv e'vit arc'hoazh". Goude ar c'hloerdi hag an arme e kerzho war-zu Doue en ur soñjal e petra a c'hallo lavarout dezhañ o c'hortoz war e zaoulin bezañ barnet gantañ.

Kanerien

Enrollet e oa meur a wech gant an ti-embann Mouez Breiz war pladennoù 45 tro. Kanet e oa neuze da gentañ e 1959 gant Mona Kerys, er bloavezhioù 1960 gant Eliane Pronost ha laz-kanañ Kanerien Bro-Ouelou Ploueg-ar-Mor , ha goude c'hoazh gant Rozenn Bellec ha Soazig Noblet.
Muioc'h a vrud c'hoazh a roas Alan Stivell dezhañ gant e albom kentañ Reflets er bloavezhioù 1970. Hag er bloavezhioù 1990 e oa kanet gant Gilles Servat ha Yann-Fañch Kemener evit Héritage des Celtes, ha goude gant Kemener hag ar pianoour Didier Squiban. Er bloavezhioù 1990 e oa ganet gant Anne Davodeau eus laz-kanañ Mouez Bro-Landi. E 1997 e oa enrollet gant ar strollad rock keltiek L'Ange Vert en e albom Les Armes de Bretagne.

Levrlennadur ha pennadoù-skrid

• Ar en deùlin gant Yann-Bêr Kalloc'h, Pariz, 1921.
• Me zo ganet e kreiz ar mor : Chanson pour une voix et piano, 2 bajenn, Sony music publishing, 1994
• Ar en deulin Embannadurioù Kendalc'h, 1996 (ISBN 978-2-906977-02-0)
• Alan Stivell gant Laurent Bourdelas, Embannadurioù An Telegramm, 2012.
• Me zo ganet e kreiz ar mor. Quand une mise en musique devient un tube, pennad-skrid gant Anne-Marie Dumerchat-Schouten e-barzh niverenn 242 Musique bretonne, miz Genver 2015, pajennoù 34-39. Lenn ar pennad war lec'hienn Dastum.