Nike

Nike (Νίκη e gregach) e oa doueez an trec'h gant tud Hellaz kozh. Heñvelekaet eo ouzh Victoria ar Romaned.

Delwenn Nike en he sav e dorn delwenn Zeus (Mirdi ar Peniti).

Ar vojenn

Merc'h e oa d'an Titan Pallas ha da Styks (an Dour), ha c'hoar da g-Kratos (ar galloud), Bia (an nerzh), ha Zelos (ar gred, an intampi), holl doueed tost da Zeus.

Alies ez eus bet kaoz anezhi evel renerez karr an doueed. A-wechoù e vez kemmesket gant an doueez Athena, hag anvet Athena Nike.

Azeulidigezh

Delwennig eus Nike e marmor Paros, kavet en Epidauros: ouzh talbenn kornôk Templ Artemis e oa. Emañ Nike o nijal war-raok, dispak he divaskell, he gar dehoù laket en a-raok vole. En ur pezh marmor disheñvel eo an divaskell, ha staget e toulloù graet e divskoaz an delwenn. Dibenn ar IV^e kantved kt JK. War ziskouez e Mirdi Hendraouriezh Aten.

Azeuliñ an doueez a veze graet gant prosesionoù, evadegoù, aberzhoù, evit treiñ Nike a-du gant hec'h azeulerien. Goulennoù e stumm pedennoù a c'halled kinnig d'ar belegezed en temploù, hag ar re-se o c'hemenne d'an doueez en orakloù. Ma veze respont digant an doueez e veze roet d'ar goulenner gant ar velegez.

Un delwenn da Nike, Nike Samothrake (pe "Trec'h Samothrake"), a c'haller gwelout e Mirdi al Louvre e Pariz.

Anvioù deveret

• Anvioù-tud :
  • Berenis, ha Veronika, ur stumm latinekaet, a zo anvioù heñvel;
  • Nikeforos, Nikomedes, Nikodemos deuet da vout Nicéphore, Nicomède, Nicodème, e galleg);
  • Nicasius, anv latin, deuet da vout Nicaise e galleg.
• Anvioù-lec'hioù: kêrioù Nikea, Nisa.

Skeudennoù Nike

Alies e vez diskouezet evel un doueez askellek. Un delwenn brudet anezhi eo an Athena Nike (anvet ivez Nike Samothrake) a zo miret e Mirdi al Louvre.

• 
  Nike Samothrake, e mirdi al Louvre
• 
  Nike Kolc'his, e Jorjia
• 
  Nike Efesos
• 
  Bernhard Heiliger: Nike (1956)