Norwegian Wood (This Bird Has Flown)

Norwegian Wood (This Bird Has Flown) a zo ur ganaouenn saoznek gant ar strollad sonerien saoz The Beatles.

Norwegian Wood

sonaozadur

Titl	Norwegian Wood
Subtitle	This Bird Has Flown
Seurt oberenn	kanaouenn
Tachenn	sonerezh pop
Dezerc’her	The Beatles
Yezh an oberenn pe an anv	saozneg
Deiziad embann	3 Kzu 1965
Sonaozer	John Lennon, Paul McCartney
Testenn gant	John Lennon, Paul McCartney
Produer	George Martin (sonaozour)

Daoust ma voe lakaet war gont ar c'houblad Lennon-McCartney hervez an emglev boas, savet e voe ar sonenn gant John Lennon (1940-1980) e gwirionez, e miz C'hwevrer 1965. D'an ampoent, edo an arzour o vakañsiñ e Saint-Moritz (Suis) a-gevret gant Cynthia Powell (e wreg kentañ, 1939-2015), George Martin (produour ar strollad, 1926-2016) ha Judy Lockhart Smith (a yeas da wreg Martin e 1966). Kenlabourat a reas Paul McCartney (1942-) gantañ koulskoude pa voe anv d'he feurachuiñ.

Dimezet e oa Lennon abaoe miz Eost 1962 hag eñ an hini nemetañ eus izili The Beatles er stad-se. Lavarout e oa e barr an eurvad a vefe kement ha pentañ lern ; doganañ e wreg a rae, ken alies e kave tro d'hen ober gant estlammerezed ar strollad. N'eo ket souezh eta e krogfe Norwegian Wood gant "I once had a girl Or should I say she once had me"... oc'h anzav e emzalc'h dre gomzoù goloet. E buhezskrid Lennon skrivet gant Philip Norman (1943-), embannet e 2008, e tispleg an aozer e krede da gement hini e oa kaoz eus Maureen Cleave (1934-), ar pezh a voe dislavaret gant ar gazetennerez saoz evelato. Er memes levr e veneg Norman anv Sonny Freeman (gwreg al luc'hskeudenner Robert Freeman) a gustume degemer Lennon en he ranndi he mogerioù lambrusket ("She showed me her room, isn't it good, norwegian wood?") diwezhat diouzh an noz.

Enrollet e voe e studioioù EMI e Londrez d'an 12 ha 21 a viz Here 1965 gant ar strollad en e bezh, George Harrison (1943-2001) o seniñ sitar evit ar wech kentañ en ul albom sonerezh pop. 2:01 he fad e voe kanet gant Lennon hag embannet d'an 3 a viz Kerzu 1965 evel eil kanaouenn an albom Rubber Soul.

Dizimeziñ a reas John ha Cynthia Lennon d'an 8 a viz Du 1968 tra ma taremprede ar c'hanour an arzourez japanat Yoko Ono (1933-) abaoe mizvezhioù c'hoaz.

Ar gerioù...

• ...war al lec'hienn LYRICSFREAK.

Levrlennadur

• Tim Hill, THE BEATLES Quatre garçons dans le vent, Éditions Place des Victoires, miz Here 2008 pajenn 89.

Liamm diavaez

• Doare arnod Norwegian Wood (This Bird Has Flown), kanet gant The Beatles.