Zaz

Isabelle Geffroy, pe Zaz hervez hec'h anv-micher, zo ur ganerez c'hall, ganet d'ar 1añ a viz Mae 1980 e Teurgn. Kanañ a ra en doareoù jazz pe soul. Brudet eo bet gant ar ganaouenn "Je veux", en he c'hentañ albom e 2010, ha diwar neuze eo deuet da vezañ ur ganerez etrebroadel e galleg dreist-holl, a-wechoù e spagnoleg. Pa c'houlenner dezhi gant piv eo levezonet e lavar gant "Ar Pevar Amzer" Vivaldi, kanerezed jazz evel Ella Fitzgerald, kanaouennoù gall Enrico Macias, Bobby McFerrin ha Richard Bona, hag ar sonerezh afro, latino-amerikan ha kuban.

He zud-kozh a-berzh tad a oa labourerien-douar eus Logivi-Plougraz. E 1994 e ya da vevañ e Libourne gant he mamm, he breur hag e c'hoar. Kregiñ a ra da studiañ ar sonerezh hag ar c'han e Bourdel. Kanañ a ra goude e meur a strollad eus rannvro Bourdel. Treiñ a ra e Rusia, Ejipt pe c'hoazh Japan gant kanaouennoù gallek brudet (Edith Piaf, Jacques Brel, Charles Aznavour, Joe Dassin hag all). D'an 10 a viz Mae 2010 e ya er-maez he albom kentañ "Zaz" hag ar single "Je veux" hag a zismegañs ar gevredigezh veveziñ, ar pezh a blij da TF1 hag a skign ar c'hlip e-pad an hañv. Ober a ra Zaz un droiad eta, e Frañs a-bezh, Suis, Belgia, Kanada ha Berlin, ha kregiñ a ra d'ober berzh e marc'had ar ganaouenn c'hallek. Roet eo dezhi prizioù evel hini akademiezh Charles Cros, ar Victoire de la Musique gall, titloù a bep seurt gant ar mediaioù gall. Kemer a ra perzh e arvestoù Les Enfoirés. Pladenn diamant a ya ganti e Frañs.

E Mae 2013 eo pladenn diamant he eil albom Recto Verso. Roet eo priz ar SACEM dezhi. Ober a ra un droiad etrebroadel e kalz broioù en Europa, Amerika hag Azia. E 2014 e kan en he zrede albom ur skeudenn beurvat eus Pariz, ar pezh a blij d'he selaouerien etrebroadel. E 2018 e embann he pevare albom Effet Miroir hag ar single e spagnolek Qué vendrá. En he albom Isa e 2021 e kan en eil single Le jardin des larmes gant Till Lindemann, kaner Rammstein.

Albomoù

Zaz, 2010
San tsu tsou (live), 2011
Recto Verso, 2013
Paris, 2014
Sur la route (live), 2015
Effet miroir, 2018
Isa, 2021