Allobroged

An Allobroged pe Allobroges (hervez al latin) a oa ur bobl c’halian diazezet etre ar stêrioù Ron hag Isère, Alpoù an Hanternoz ha Lenn Geneva, er c’hentañ kantved kent JK, el lec’h m’emañ bremañ Savoia ha Daofinez. Vienne e oa o c’hêr-benn, ha Genève (diwar ar ger genoù) a oa ur gêr all dezho . Brudet e oant da vezañ brezelourien gadarn.

Galia er c’hentañ kantved kent JK.

Diner an Allobroged (Iañ kantved kent JK)

Bro an Allobroged.

O anv

Talvezout a rafe an anv Allobroges kement ha « tud eus ur vro all », « tud arallvro », diwar an div elfenn c'halianek allo-, « all », ha *brogi- « bro ».

Istor

Diwar bluenn Caesar, en De Bello Gallico, e lenner e oant o chom e hanternoz Gallia Transalpina pe Narbonensis. Pelloc’h, en hanternoz da Lenn Geneva, edo an Helveted. Aloubet e voe o bro gant ar Romaned e -121, met ne oa ket deuet-mat ar vistri nevez hag o zailhoù gant an Allobroged ha meur a wech en em savjont a-enep o alouberien (-77, -61, -43).

Strolladoù Allobroged a gemeras perzh en armeoù Caesar koulskoude e-pad Brezel Galia. Da vare an impalaer Aogust e voe rannet Gallia Narbonensis e div lodenn ha krouet e voe proviñs Gallia Viennensis. Dont a reas Vienne da vezañ ur greizenn roman a bouez er broviñs-se.

E dibenn an Impalaeriezh roman, er IV^e kantved, e teuas bro an Allobroged da vezañ anvet Sapaudia, ur ger hag a zo aet da Savoia diwezhatoc'h. Er V^vet kantved e voe taget hag aloubet proviñs Vienne ha Sapaudia gant pobloù german evel ar Vurgonded.

Kan

Les Allobroges pe Le Chant des Allobroges eo anv kan broadel Savoia.

Liammoù diavaez

• Les Allobroges et l’Allobrogie – Archéologie et toponymie
• Les Allobroges - Dictionnaire Historique de la Suisse

Pennadoù kar

• Catugnatos
• Insula Allobrogum
• Pobloù Galia
• Pointe Allobrogia