John Davies (istorour)

John Davies (1938 - 16 a viz C'hwevrer 2015[1] a oa un istorour kembreat, anavezet evit e levrioù hag e abadennoù skinwel diwar-benn istor Kembre.

John Davies, e miz Genver 2013.

Buhez kemmañ

Ganet e oa John Davies e traoñienn Rhondda, e su Kembre[2], met tremenet en doa e vugaleaj e kêriadenn Bwlch-llan e Ceredigion ha gant se e voe lesanvet diwezhatoc'h John Bwlchllan. Mont a reas da skol-veur Kerdiz ha goude-se da skol-veur Cambridge d’ober studioù istor. Ur post a dapas e skol-veur Aberystwyth da gelenn istor Kembre.

Er bloavezhioù 1980 e voe goulennet digantañ sevel ul levr krenn diwar-benn istor Kembre evit embannadurioù Penguin Books. War c’houlenn an embanner e savas e oberenn e kembraeg. Embannet e voe gant an ti bras-se, e kembraeg eta, e 1990, ha kement a verzh a reas ma voe embannet un droidigezh anezhañ e saozneg e 1994. Kemer a rae perzh John Davies ivez, aliezik, en abadennoù skinwel ha skingomz war istor Kembre.

Brogarour e oa ha sekretour broadel kentañ Cymdeithas yr Iaith Gymraeg e voe en e yaouankiz.

E 2005 e voe roet Gwobr Glyndŵr dezhañ, abalamour d’ar pezh en doa degaset da vuhez an arzoù e Kembre. E 2010 en doa bet ur priz all, priz Llyfr y Flwyddyn pe "Wales Book of the Year", gant e levr Cymru: Y 100 lle i'w gweld cyn marw ("Kembre : ar 100 lec’h da welet a-raok mervel"). Ren a reas ivez embannadur Gwyddoniadur Cymru ("holloueziadur Kembre"), embannet e kembraeg hag e saozneg e 2008[3].

Levrioù kemmañ

  • Cardiff and the Marquesses of Bute (1981)
  • The green and the red : nationalism and ideology in twentieth century Wales (1984)
  • Hanes Cymru (1990) (adembannet e 2006 hag e 2007)
  • Broadcasting and the BBC in Wales (1994)
  • A history of Wales (1994) (troet diwar Hanes Cymru, adembannet e 1996, 2006, 2007)
  • Plaid Cymru oddi ar 1960 (1997)
  • The making of Wales (1999)
  • The Celts (2000)
  • Y Celtiaid (2001)
  • Cardiff : a pocket guide (2002)
  • Cymru: Y 100 lle i'w gweld cyn marw, Gwasg Y Lolfa (2009).

Notennoù kemmañ