Europa ar C'hreiz

Europa ar C'hreiz, pe Kreizeuropa, pe c'hoazh Kreiz-Europa, a zo ur rannved eus kevandir Europa etre Europa ar C'hornaoueg hag Europa ar Reter. Gwall cheñch-dicheñch eo bevennoù ar re-mañ avat. N'eo ket kemeret e kont gant Aozadur ar Broadoù Unanet evit e stadegoù (na ra nemet gant Europa an Norzh, Europa ar Reter, Europa ar Su hag Europa ar C'hornaoueg), met deuet eo diouzh ar c'hiz en-dro abaoe m'eo aet da get ar gael houarn e deroù ar bloavezhioù 1990. A-raok e oa rannet strizh ar c'hevandir gant Europa ar Reter (a heulie strizh an URSS), hag Europa ar C'hornaoueg (a oa dre vras eus tu an Amerikaned), ha rannet e oa Kreiz ar c'hevandir dre an hanter.

Un doare da welet Europa ar C'hreiz. Gwer teñval: lodennoù a vez lakaet enni; gwer sklaer: lodennoù a vez lakaet enni a-wechoù.

Rannoù Europa hervez ar struzh (kartenn saoznek).

Un doare all da welet Kreiz-Europa, diaezezet dreist-holl war ar sevenadur hag an istor. Gwelet a reer emañ ar broioù balt e-barzh ha Slovenia ha Kroatia a-bezh (kartenn alamanek).

Stadoù

N'eo ket gwall aes bevenniñ sklaer pere eus ar stadoù a zo da lakaat e-barzh ha pere n'emaint ket. Dre vras e c'haller lakaat ar re-mañ:

•  Alamagn
• Aostria
•  Hungaria
• Liechtenstein
•  Polonia
•  Slovakia
•  Slovenia (lakaet alies en Europa ar Su gant ar peurrest eus ar Balkanioù)
•  Suis
•  Republik Tchek

Al lodennoù-mañ a vez lakaet e-barzh ivez a-wechoù evit abeg-pe-abeg (sevenadurel, douaroniezhel, pe istorel):

• Elzas ha Loren e  Frañs
• Königsberg e Rusia
•  Kroatia (en he fezh pe Slavonia hepken)
•  Luksembourg
• Sutirol ha Trentino en  Italia
• Treuzsilvania e Roumania
• Ukraina ar C'hornaoueg en Ukraina
• Voivodina e  Serbia

Gwelet ivez

• Europa ar C'hornaoueg
• Europa an Norzh
• Europa ar Reter
• Europa ar Su