Pieter de Hooch
Pieter de Hooch[1] (Rotterdam, badezet d'an 20 a viz Kerzu 1629[2] - Amsterdam, etre 1684 ha 1694[3]) a oa ul livour nederlandat eus mare kantved aour an Izelvroioù. Oberennoù barok a livas, ha renket e vez e-touez arzourien ar skol izelvroat.
E vuhez
kemmañPieter De Hooch a voe badezet en iliz an Disivoud e Rotterdam d'an 20 a viz Kerzu 1629. Hendrick Hendricksz De Hooch,e dad, a oa mañsoner, hag a e vamm, Annetge Pieters hec'h anv, a oa amiegez. Bugel henañ ur familh a bemp bugel e oa, met ar pevar bugel all a varvas pa oant yaouank. Hervez Arnold Houbraken en dije de Hooch desket asambles gant Jacob Ochtervelt e ti al livour gweledvaoù Nicolaes Berchem, e Haarlmen, etre 1645 ha 1647. N'eus liamm ebet etre oberenn de Hooch ha hini Berchem koulskoude. Hervez Fleischer en dije de Hooch desket e Rotterdam e ti Ludolf De Jongh, ar pezha seblant gwiroc'h, dre ma'z eus perzhioù boutin da oberennoù kentañ de Hooch ha da re de Jongh. De Hooch a voe levezonet ivez gant oberennoù Rembrandt ha re Carel Fabritius.
Meneget eo e anv e Delft e miz Eost 1652 : de Hooch hag e zeskard Hendrick Van der Burch a voe testoù embann un testamant. E Delft e labouras dreist-holl evit ur marc'hadour lien pinvidik, Justus de La Grange e anv. E 1655 e oa perc'henn de La Grange war unnek taolenn savet gant de Hooch. De Hooch a labouras ivez evit stal de La Grange. De Hooch a zimezas gant c'hoar Van der Bruch, Jannetje hec'h anv, e miz Mae 1654, ha seizh bugel a voe ganet. E 1655 e voe enskrivet e kouch Sant-Lug. War-bouez ar pezh a livas diwar c'houlenn de La Grange, ne reas ket kalz berzh e-keit ma oa e Delft, hag er baourentez e vevas. D'ar mare-se e livas dreist-holl taolennoù teñval, enno darvoudoù fentus.
Tro 1658 e kemmas doare Pieter De Hooch da livañ, ha sklaeroc'h e teaus e oberennoù da vezañ. Muioch a zonder a voe enno ivez, dre ma krogas da implijout an diarsell. Marteze e voe levezonet ivez gant Johannes Vermeer. Ar prantad-se a badas betek 1662.
E 1660 pe e 1661 ez eas d'en em staliañ e Amsterdam. Eno e voe badezet unan eus e verc'hed - Diewertje hec'h anv – er Westerkerk, d'ar 15 a viz Ebrel 1661. Eno e rankas de Hooch daremprediñ renkadoù uhel ar gevredigezh : cheuc'hoch ha pinvidikoc'h e voe ar pezh a livas (diabarzh tiez). Taolennoù brasoc'h a reas ivez, ha ne oa ket ken sklaer ar skeudeoù a live. Ne anavezer ket kalz eus an oberennoù a savas d'ar mare-se.
Daoust ma oa pinvidik klianted de Hooch, e kasas e vloavezhioù kentañ e Amsterdam en ur c'harter paour. E 1668 e tilojas d'ur c'harter pinvidikoc'h, met ne c'hellas ket prenañ e di.
Ne ouezer ket kalz tra diwar-benn fin e vuhez. Peurliesañ e vez mesket gant e vab, Pieter Pietersz De Hooch (1605-1684), hag a vije bet e zeskard. Hemañ a varvas e ti ar re sot (Dolhuis) e Amsterdam. Eno e oa dalc'het abaoe 1679, ha douaret e voe d'ar 24 a viz Meurzh 1684 e bered St. Anthonius Kerkhof[4]. Ne ouezer ket e pe vloavezh er varvas Pieter de Hooch, marteze er memes bloavezh hag e vab, marteze dek vloaz goude.
Pieter De Hooch a implije livioù tomm, dreist-holl ruz ha ruz-gell.
Levezonoù
kemmañLevezonet e voe De Hooch ivez gant oberennoù Jan Steen, Rembrandt, Carel Fabritius, Nicolaes Maes ha Gerard ter Borch.
Notennoù
kemmañ- ↑ hag ivez Pieter De Hoogh, Pieter De Hooghe ha Pieter Hendricksz. De Hooch
- ↑ Rijksbureau voor Kunsthistorische Documentatie – RKD.
- ↑ Un den anvet Pieter De Hooch a varvas e ti ar re sot e Amsterdam ha douaret e voe d'ar 24 a viz Meurzh 1684, met unan eus mibien al livour e oa. Ar roud skrivet diwezhañ diwar-benn de Hooch eo ar marilh ma enskrivas e vab e ti ar re sot – F. Grijzenhout, « New Information on Pieter de Hooch and the Amsterdam Lunatic Asylum », e-barzh Burlington Magazine, CL (miz Gwengolo 2008), p. 612-613 –, met unan eus oberennoù Pieter de Hooch a zo deiziet e 1684 - RKD.
- ↑ RKD.
