Strollad An Deskadurezh Eil Derez

Strollad An Deskadurezh Eil Derez (S.A.D.E.D. pe SADED) a oa ur gevarzhe krouet e 1962 hag a ginnige kentelioù dre lizher, hag e KEAV. Strollad An Deskadurezh Eil Derez a oa e vennad lakaat en e sav ur c’helennerezh a live gant ar c’hlasoù dibenn studi hag ar bloavezhioù kentañ er skol veur.

Istor

Krouet eo bet e 1962. Labourat a reas ur paot-mat a ouizieion e S.A.D.E.D. : Guy Étienne, Goulven Pennaod, René Le Gléau, Gwilherm Dubourg, Paol Kalvez, Pêr Even, Gab Chérel, Remont Jestin, Bernez Jestin, Hubert Jestin...

E 1963 ez embanne e gentelioù kentañ. Roet e veze ar re-mañ dre lizher e-doug ar bloavezh ha da-geñver devezhioù studi e-kerzh an hañv. Berzh a reas diouzhtu ar skol. Deraouet e voe gant pevar rummad : Lennegezh, Istor, Fizik, Douaroniezh. Goude pemp bloaz e tiraeze ur raklun a 150 kentel war 12 danvez, en o zouez ar Vevoniezh, ar Ventoniezh, ar Gimiezh, ar Yezhadur hag, en derez skolveurel, ar C’hrennvrezhoneg, an Armerzhouriezh, an Ensavadurioù politikel, ar Gwir bonreizhel.

Gant S.A.D.E.D. eo bet diazezet an doare da intent ha kompren ar gramadeg dre an orioù, eleze dibenn ar verboù displeget e-lec'h ar yezhadur klasel a-orin gall : "Bonragor, Bongevor, Bonator" e lec'h "Amzer-dremenet strizh, amzer a-vremañ, amzer da zont". Kentelioù yezhadur ha gramadeg S.A.D.E.D. a gaver el levr Gramadeg ar verb embannet gant Preder

Levrioù ha kentelioù gant S.A.D.E.D.

• Dornlevr Krennvrezhoneg, Goulven Pennaod, 1964.
• Dafar 64, Preder, 1964.
• Kamp etrekeltiek ar vrezhonegerion 1964, (Kentelioù ar Rummad Uhel), Gwenael Maze, Ronan Ar Glew, Erwan Gwegen, Mari-Elen Maze, Goulven Pennaod, Loeiz Lemoine, Ivona Konan, Preder, 1964.
• Kamp etrekeltiek ar vrezhonegerion 1965, Erwan Gwegen, Goulven Pennaod, Turiaw ar Menteg, Olivier Loyer, Preder, 1965.
• Kamp etrekeltiek ar vrezhonegerion 1966 (Kentelioù ar Rummad Uhel), Turiaw ar Menteg, Mari-Elen Maze, Gab Cherel, Ronan Jolais, Gwernegan, Yeun Gourves, Tangi Louarn, Preder, 1966.
• Gramadeg ar verb, 1966.
• Kant ugent testenn verr a lennegezh, 1970.
• Douaroniezh 1, 1972.
• Douaroniezh 2, 1973.

Echu e oa gant Strollad An Deskadurezh Eil Derez e-korf ar bloavezhioù dek-ha-tri-ugent. Krog eo Preder da embann kentelioù S.A.D.E.D. en o fezh : graet eo evit a sell ar c'hentelioù a grennvrezhoneg hag a yezhadur.