Timbroù Surinam
Un drevadenn nederlandek eo bet ar vro amerikan anvet Suriname, bet anavezet gwechall dindan anv Gwiana an Izelvroioù. Deuet eo da vout un tiriad emren e miz Kerzu 1954 hag ur republik dizalc’h e miz Du 1975. E 1873 e voe embannet an timbroù kentañ. Kinnig a raent poltred Wilhelm III an Izelvroioù, gant prizioù-talvoud ha livioù disheñvel. Nebeut tre a dimbroù a voe embannet goude : penn ar rouanez Wilhelmina yaouank (rummad 1893) pe en en oad gour (rummadoù 1904-08 ha 1913-15) a ra d’ober an darn vrasañ eus oute.
Dav eo gortoz ar bloavezh 1927 ha da heul evit gwelet timbroù liesseurt, timbroù madelezus alies : evit mad ar Groaz Wer (a sikoure reuzidi an drastadennoù naturel en Izelvroioù), evit ar re yaouank, evit lidañ deiz-ha-bloaz misionoù Breudeur Moravia…
E 1945 e teuas er-maez ur rummad timbroù levezonet mat gant ar rummadoù a gaver en trevadennoù saoz ha gall en amzer-se : gweledvaoù sioul ha hoalus, tud ar vro dizanv, pinvidigezh ar vro (mengleuzioù, korzioù sukr…) ha poltred ar rouanez er c’horn.
E 1953 e voe dreistmoullet an timbroù savet e 1948 war patrom re an Izelvroioù (dremm ar rouanez Juliana) gant ar gerioù STORMRAMP NEDERLAND 1953 (Barrad-avel dismantrus) hag ur priz uhelaet.
E 1954 e tapas ar Surinam ur statud “Dominion” e-ser Rouantelezh an Izelvroioù. Tro 320 timbr a voe embannet etre ar bloaz-se ha 1975, pa teuas ar Surinam da vezañ ur stad dizalc’h.
Merket e voe an taol-dispac’h a c’hoarvezas e 1980 hag a voe heuliet gant diktatouriezh ar soudarded gant un timbr a enoras deiz-ha-bloaz an Nevezerezh Broadel. E 1984 e voe lakaet e gwerzh un timbr evit brudañ Kampionad soudardel etrebroadel ar basket-ball…
Liesseurt e oa danvez an timbroù avat : gizioù ar vro, an natur, tudennoù vrudet ar bed (Nicéphore Niépce, Martin Luther, timbroù madelezus evit ar re yaouank… 15 timbr warno panelloù-hent a voe lakaet e gwerzh evit brudañ an tremenerezh-hent !
Adal ar bloazioù 2000 e krog ar velestradurezh da embann un niver bras spontus a dimbroù evit o lakaat war marc’had etrebroadel an dastumerien. 80 timbr a voe embannet e 2007 da skwer, gouestlet d’ar marmouzed, balafenned, pesked, evned, raneged…