Alfonso II d'Este

Alfonso II d'Este, ganet e Ferrara d'an 22 a viz Du 1533, ha marvet eno d'ar 27 a viz Here 1597, a oa mab da Ercole II d'Este ha da Renée Bro-C'hall (pe Renata di Francia en italianeg), mab-bihan da Anna Vreizh eta. Pempvet dug Ferrara e voe adalek 1559 betek e varv.

E vuhez

Kenkent hag anvet da zug e sevenas goulenn ar pab Pi IV a felle dezhañ e vije kaset an dugez Renata da Vro-C'hall en-dro dre ma roe harp d'ar brotestanted en he lez hag e kenskrive gant Jean Calvin a oa deuet d'he gwelout da Ferrara.

E-pad e amzervezh e skedas lez Ferrara muioc'h eget biskoazh, e tegemeras barzhed evel an Tasso, e veze aozet festoù bras, ha fontet arc'hant a-leizh. Klask a reas kreskiñ brud ha bri e zugelezh gant e dri dimeziñ hag e emglev gant an impalaer santel Masimilian II er brezel a-enep an Durked en Hungaria e (1566).

Dimezioù

Teir gwech e timezas:

e 1558 da Lucrezia di Cosimo de' Medici (1545–1562), dimezet da 13 vloaz, marvet da 17 vloaz;
e 1565 da Barbara Aostria, merc'h da Ferdinand Iañ an Impalaeriezh Santel ,
e 1579 da Margherita Gonzaga, merc'h-vihan da Ferdinand Iañ an Impalaeriezh Santel , marvet da 54 bloaz.

Bugel ebet n'en doa bet, se zo kaoz ec'h anvas e genderv Cesare d'Este da hêr.

Pa varvas e voe adkemeret dugelezh Ferrara, douar an Iliz, gant ar pab Klemez VIII ha n'enebas ket Cesare d'Este nemeur, trawalc'h dezhañ bezañ dug Modena.

Beziet eo e Ferrara e Manati Corpus Domini.