Barrennig-stagañ

Ar varrennig-stagañ zo un arouez a lakaer etre daou c'her evit o stagañ. E brezhoneg e vez implijet stank.

Taol-mouezh

Talvoudus ar varrennig-stagañ da c'houzout pelec'h e vez lakaet an taol-mouezh, pa ouzer e rank kouezhañ, hervez ar reolenn, war eil silabenn diwezhañ ar ger diwezhañ. Kement-se a zo splann e-barzh fest-noz, skol-veur, tad-kozh.

Met ne vez ket lakaet an doare-skrivañ da blegañ d'an distagadur peurvuiañ, a-hend-all e vije skrivet

• de-mat e-lec'h demat,
• diouzh-tu e-lec'h diouzhtu,
• hanter-noz e-lec'h hanternoz,
• ouzh-penn e-lec'h ouzhpenn,
• rak-tal e-lec'h raktal, hag all.

Gerioù kevrennek

Lakaet e vez ur varrennig-stagañ:

• en araogennoù kevrennek: a-berzh, e-barzh, e-kreiz, da-heul, diwar-benn, war-dro,
  • met en un doare iskis ne vez ket lakaet e-barzh araogennoù kevrennek zo (nemet gant un nebeudig skrivagnerien) pa vez skrivet da di, eus perzh
  • da-di a vez skrivet gant Jules Gros

• en adverboù: a-wechoù, e-leizh,
  • koulskoude e vez skrivet raktal, ouzhpenn

• en anvioù-gwan savet gant daou c'her:
  • mat-tre, fall-kenañ, gleb-teil,

• en adverboù evel: noz-deiz, traoñ-krec'h

• er gerioù savet war ar patrom treiñ-distreiñ
  • verboù: kas-degas, mont-dont
  • anvioù-gwan: kamm-digamm, ruilh-diruilh

• en niveriñ, daou warn-ugent ha daou-ugent
  • e Yezhadur bras ar brezhoneg (pajenn 264) e kaver daou-c'hant, naontek-kant, ha tri mil. Marteze n'eus ket ezhomm da lakaat barrennig-stagañ ebet aze.

• en anvioù kadarn kevrennek
  • evel fest-noz, marc'h-houarn
  • evel tad-kozh, marc'h-du
    • koulskoude ne vez ket a-du an holl
    • amzer-vremañ a skriv lod, amzer vremañ a skriv lod all; an eil hag egile a gaver e Yezhadur bras ar brezhoneg.

En anvioù divoutin

En anvioù-lec'h zo, savet gant daou c'her: Aber-Ac'h, Bro-Gembre, Sant-Yann, Kastell-Paol.

Koulskoude e vez skrivet

• Kergozh, Plouyann, Tredraezh, Langoad, Lokrist, Penmarc'h
• Lambaol ha Kastell-Paol , taolmouezhiet o-daou war ar silabenn ziwezhañ
• Kastell-Paol ha Kastellin, taolmouezhiet o-daou war ar silabenn ziwezhañ
• Kenec'hdu, an Dourdu
• Stêr Aon, Menez-Bre

E saozneg ne vez ket implijet ar varrennig-stagañ kemend-all (New Zealand, St Ives), ha tud zo a gav gante eo mont da-heul an doare gallek, ha mont re bell ha pelloc'h c'hoazh: n'eus barrennig-stagañ ebet e-barzh Pays de Nantes pa vez lakaet unan e Bro-Naoned.

Lemel ar varrennig-stagañ

A-wechoù e vez lamet ar varrennig-stagañ.

• a-raok, met araokañ
• e-barzh met ebarzhañ...

Levrlennadur

• Yezhadur bras ar brezhoneg
• Geriadur Roparz Hemon
• Yezhadur Eugène Chalm

Sellit ouzh ar ger Barrennig-stagañ er
wikeriadur, ar geriadur frank.