Giuliano de' Medici (1453-1478)

Ur pennad Giuliano de' Medici zo ivez.

Giuliano de' Medici, ganet e 1453 ha marvet d'ar 26 a viz Ebrel 1478, a oa ur penn-stad italian er XVvet kantved, kenlevier Republik Firenze e deroù an Azginivelezh italian.

Poltred Giuliano de' Medici gant Sandro Botticelli, 1478

Poltred gant Bronzino

E vuhez

Eil mab Piero il Gottoso ha Lucrezia Tornabuoni e oa, ha Lorenzo il Magnifico a oa e vreur henañ.
O-daou e oant e penn kêr Firenze pa voe lazhet en irienn anvet Congiura dei Pazzi, diwar anv un tiegezh galloudus all e Firenze a glaske kaout an dizober eus an daou vreur evit lakaat o c'hrabanoù war aferioù kêr-benn Toskana.

Gwreg ha bugale

Gant e serc'h Fioretta Gorini en devoa bet ur mab bastard, Giulio de' Medici, hag a zeuas da vout pab en 1523, hag anvet Klemañs VII adalek neuze.

Brudet eo e garantez ouzh Simonetta Vespucci, lesanvet ar « San par » (an hini hep he farez). Poltredet int bet evel an doued Meurzh ha Gwener gant Botticelli en un daolenn brudet Venere e Marte .

E varv

Kann a oa bet en Santa Maria del Fiore iliz-veur Firenze, e-pad an oferenn. Kement-se a oa bet ragaozet gant an tiegezh Pazzi, gant asant ar pab Sistus IV ha skoazell Francesco Salviati arc'heskob Pisa, hag abalamour ma oa konnaret ar re Pazzi o vezañ chomet o fri war ar gloued pa oa bet roet kargoù d'ar re all. Lazhet e oa bet Giuliano, met dic'hloaz ha divac'hagn e oa e vreur henañ. Lorenzo a oa a roas urzh da grougañ an iriennerien ouzh prenester e balez.

Droug a savas neuze er pab o welout kastiz e vignoned, hag eskumunugañ a reas Lorenzo, ar breur chomet bev.

Arz

Meur a boltred zo anezhañ. Pevar a zo brudet:

• unan gant Agnolo Bronzino,
• tri gant Botticelli
• Poltred Giuliano de' Medici (Botticelli Bergamo)
• Poltred Giuliano de' Medici (Botticelli Berlin)
• Poltred Giuliano de' Medici (Botticelli Washington)

Pennad kar

• Giuliano de' Medici

Giuliano de' Medici, pri-poazh gant Andrea del Verrocchio, war-dro 1475/1478, en National Gallery of Art

Levrlennadur

• Marcello Vannucci, I Medici. Una famiglia al potere, Roma, Newton Compton Editori, 1994
• Medici, Associazioni alberghi del libro d'oro, Nike edizioni 2001
• J. R. Hale, Firenze e i Medici, Mursia, Milano 1980
• Lauro Martines, Le sang d'avril - Florence et le complot contre les Médicis - Albin Michel - Histoire - Paris - 2006