Jermen Auxerre
Jermen Auxerre (Garmon e kembraeg), ganet war-dro 378 en Auxerre, e Galia, ha marvet d'an 31 a viz Gouhere 448 e Ravenna (Italia) a oa un eskob galian er Vvet kantved hag ur politikour a bouez bras en e amzer .
| Reizh pe jener | paotr  |
|---|---|
| Bro ar geodedouriezh | Henroma |
| Anv e yezh-vamm an den | Germain d'Auxerre |
| Anv-bihan | Germain |
| Deiziad ganedigezh | 378 |
| Lec'h ganedigezh | Auxerre |
| Deiziad ar marv | 31 Gou 448 |
| Lec'h ar marv | Ravenna |
| Yezhoù komzet pe skrivet | latin |
| Micher | beleg katolik, eskob katolik |
| Karg | Roman Catholic Bishop of Auxerre, diocesan bishop |
| Studier | Padrig |
| Bet studier da | Amator |
| Relijion | Iliz katolik roman |
| Stad ar c'hanonizasion | sant |
| Gouel | 31 Gouere |
| Prantad | Low Roman Empire |
Istor
kemmañTud a renk uhel e oa e dud, ha desket mat e voe. Gouarnour e voe, en Arvorig marteze, hag e lec'hioù all.
Dont a reas da vout kristen, hag anvet e voe da ziagon gant an eskob Amator.
Eskobet e voe e 418, war-lerc'h marv Amator, rak dibabet e oa bet gant an eskob kozh en desped dezhañ hervez ar vojenn. Stourm a reas ouzh ar belagiegezh gant e geneil Hilarius, arc'heskob Arle. Klevout a reas e oa en Enez Vreizh un den anvet Agricola, mab d'un eskob, hag a oa krog da vrudañ an disivoud er vro.
Ur sened-eskibien a voe bodet e Troyes ha dibabet e voe kas Jermen ha Loup Troyes da Vreizh da enebiñ ouzh ar belagiz, da virout na zirannje Iliz Breizh diouzh hini Roma ha na zistaolje kelennadurezh Sant Aogustin diwar-benn grasoù Doue.
En Enez Vreizh
kemmañDiv wech ez eas da Enez Vreizh da stourm ouzh an disivoud.
- E 429 pe 430 ez eas gant Loup Troyes, a oa mab-kaer an eskob Hilarius.
- E 446 pe 447 ez eas adarre ha degemeret e voe gant ar roue Elaf.
Diskibien e-leizh en doe, ha darn anezho (Iltud, Brieg, Gweltaz) zo anavezet evel sent vrezhon Arvorig.
Lod a wel e Jermen Auxerre orin istorel donedigezh menec'h Enez Vreizh da Arvorig, ha da-heul, krouidigezh Breizh.
E vez
kemmañMervel a eure e Ravenna, kêrbenn an Ostrogoted da neuze, e miz Gouhere 448 pe 449. Kaset e voe e gorf, evel en doa goulennet, da Auxerre en-dro. Pemp plac'h yaouank a voe dibabet da vont da-heul an arched: Pallaye, Magnance, Procaire, Camille ha Maxime. Skuizhet meurbet gant ar veaj ne dizhjont ket ar pal, ha mervel a eurejont war an hent. O anv zo bet roet da veur a gêriadenn, evel Sainte-Magnance, Sainte-Pallaye e departamant an Yonne .
E-lec'h ma voe beziet e voe savet abati Saint-Germain gant ar rouanez Klotilda, gwreg ar roue frank Klovis. Pa voe kavet e gorf divrein bloavezhioù war-lerc'h e voe miret en iliz abatiel. Distrujet e voe gant an Hugunoded e 1567.
Skridoù
kemmañAnavezet eo e vuhez a voe skrivet gant Constantius Lyon, war-dro 480. Hennezh a oa keneil da'n eskob Lupus a oa gant Jermen en Enez Vreizh.
E Breizh
kemmañ- Sant Jermen an hini zo enoret en iliz Pleiben, hag a zo kaoz anezhañ en anv al levr E Skeud Tour Bras Sant Jermen gant Yeun ar Gow.
- E Plogastell-Sant-Jermen ivez, evel just, e kaver ur chapel Sant Jermen a c'hellfe bezañ bet iliz kentañ ar barrez.
Levrlennadur
kemmañ- Constantius of Lyon: The Life of St. Germanus of Auxerre, eds. Thomas Noble and Thomas Head, translators, in: Soldiers of Christ: Saints' Lives from Late Antiquity and the Early Middle Ages, (Pennsylvania State University Press, 1994), pp. 75–106.
- F.R. Hoare, The Western Fathers (New York: Harper Torchbooks, 1965). pàgs. 283-320.
- Article de la Catholic Encyclopedia
- E.G. Bowen, The Dedications of the Celtic Saints in Wales.
- E.A Thompson, Saint Germanus of Auxerre and the End of Roman Britain (Woodbridge, 1984).
- I.N. Wood, The End of Roman Britain: Continental Evidence and Parallels, M. Lapidge & D. Dumville ed. Gildas: New Approaches (Woodbridge, Suffolk ; Dover, New Hampshire, 1984), pàgs. 1 – 25.
- E.A Thompson, Saint Germanus of Auxerre and the End of Roman Britain (Woodbridge, 1984).
- I.N Wood, ‘The End of Roman Britain: Continental Evidence and Parallels’, in M. Lapidge & D. Dumville ed. Gildas: New Approaches (Woodbridge, Suffolk ; Dover, New Hampshire, 1984), pp. 1 – 25.