Kafr Kana

Kafr Kana (anvet ivez Kefar Kenna) zo ur gêr arabek a 18 000 a dud (e 2006), 7 kilometrad diouzh Nazaret, e Galilea (Israel).

Iliz ar Frañsezidi.

Ar gêr-se a vefe Kêr Gana en Aviel sant Yann (2, 1-11) : e Kana eo e kemeras perzh Jezuz en un eured gant e vamm hag e ziskibien, hag e reas e vurzhud kentañ o cheñch an dour e gwin. Div iliz a zalc'h ar soñj eus ar burzhud-se, un iliz c'hresian ortodoks hag iliz ar Frañsezidi.

Iliz ar Frañsezidi

An iliz a oa bet adsavet e 1881 e plas hini vras ar Groazidi. Er skalieroù a gas d'ar chapel-dindan-douar e c'heller lenn hiziv c'hoazh en hebreeg "amañ e oa laouerioù dour", skrivet en III^e kantved pe IV^e kantved. Met kement-mañ n'eo ket ur brouenn, na kennebeut an anforenn a weler e moger ar chapel-dindan-douar, rak gouzout a reer e oa bet eno ur sinagog.

Iliz sant Jord

Iliz an ortodoksed, gant he bolz wenn, he deus ivez anforennoù ken kozh all sanket er voger.

Chapel sant Bertele

En hanternoz, pa guitaer kêr, e weler ur chapelig gouestlet da sant Bertele, anvet c'hoazh Natanael, savet e-kichen an ti lec'h ma oa bet ganet. Genidik e oa "eus Kana e Bro-C'halilea" a lavar aviel sant Yann (21, 2) hag eñ eo a zisklêrias da Filip : "Daoust hag eus Nazared e c'hell dont un dra bennak a vat ?" (Yn 1,45-51).