Kimerc'h

Kimerc'h a oa ur gumun eus Breizh e departamant Penn-ar-Bed.

Dismantroù iliz-parrez kozh Kimerc'h
er Vourc'h Kozh.

Istor

• Kimerc'h a oa ur barrez eus eskopti Kerne gwechall.

Dispac'h Gall

• 1790 : Kimerc'h a zeuas da vezañ ur gumun, hep trev Logonna-Kimerc'h hag a zeuas da vezañ ur gumun distag diouti. E kumun Kimerc'h avat e oa ul lodenn vras eus Pont-ar-Veuzenn.
• Dekred eus ar 26 a viz Du 1790 war al le ret : e penn-kentañ 1791 e voe nac'het al le ouzh ar Roue, ar vro hag al lezennoù gant ar person, Le Doaré e anv, ha Salaun, kure.

XX^vet kantved

• E 1909 e oa bet savet parrez Pont-ar-Veuzenn, gant an eskob, diwar-goust parrezioù Sant-Segal ha Kimerc'h. E 1949 e oa deuet da vezañ ur gumun distag diouzh kumun Kimerc'h.
• E 1965 e oa bet bodet parrezioù Logonna-Kimerc'h, Kimerc'h ha Pont-ar-Veuzenn. Er memes bloavezh e oa bet bodet ar c'humunioù ivez, da vont d'ober ur gumun vras hepken : Pont-ar-Veuzenn-Kimerc'h.

Brezelioù

Brezel-bed kentañ

• Mervel a reas 117 gwaz eus ar gumun, da lâret eo 4,42% eus ar boblañs e 1911, abalamour d'ar brezel.

Eil brezel-bed

• Mervel a reas 45 den ag ar gumun abalamour d'ar brezel.

Brezel Indez-Sina

• Mervel a reas ur milour eus ar gumun d’an 11 a viz Kerzu 1946 e Battambang e Kambodja.

Monumantoù ha traoù heverk

• Er bloavezhioù 1950 ha 1960 e oa brudet "Radio-Kimerc'h", a adskingase abadennoù deuet eus Pariz pe eus Roazhon. Abadennoù brezhonek a voe skignet gant Radio-Kimerc'h ivez, adalek an 21 a viz Kerzu 1946. Skignet e vezent ur wech ar sizhun (d'ar Sadorn da noz) ha kaset e vezent en-dro gant Per-Jakez Helias. Betek savidigezh peul Roc'h Tredudon, e 1969, e oa Radio-Kimerc'h ar skingaser nemetañ o skignañ abadennoù radio e brezhoneg e Breizh-Izel.
• Monumant ar re varv, luc'hskeudenn.