Troad lokativel

Er yezhoniezh e vez implijet an termen troad lokativel, lokativ, tro-lec'hiad pe tro belec'h (saoz.: locative case) pa vez anv eus un droad-lec'hiañ a dalvez da verkañ al lec'h m'en em gav un den pe un dra bennak en un doare resis pe resisoc'h, o klotaat mui-pe-vui gant an araogenn "e(n)" e brezhoneg.

Yezhoù skouer

Implijet e vez an droad lokativel gant meur a familh-yezhoù dre ar bed, da skouer:

Latin

Ne veze implijet nemeur an droad lokativel e latin, hogozik atav gant anvioù kêrioù hag un nebeud anvioù-lec'h all, hag en degouezhioù all e veze implijet an droad ablativel en he lec'h peurliesañ, da skouer:

Athenae (nominativel: "Aten") → Athenis ("en Atena")

Eboracum ("York") → Eboraci ("e York")

domus ("ti") → domī ("er gêr")

humus → humī ("war an douar")

rūs → rūrī ("war ar maez")

Yezhoù slavek

E gwirionez e klota an droad lokativel gant an droad araogennek er yezhoù slavek peurliesañ, da skouer:

• E ruseg:

в библиотеке (v biblioteke)

"el levraoueg"

A-wezhoù, avat, ec'h implijer un droad lokativel rik, diheñvel an dibenn a glotae ganti diouzh hini an droad araogennek, keñveriit:

• Troad lokativel rik

лежать в снегу́ (lejaty v snegou)

"en em ledañ en erc'h"

• Troad araognnek:

думать о снеге (doumaty o snege)

"soñjal en (=diwar-benn) erc'h"

Armenieg

En armenieg e vez merket an droad lokativel gant al lostger "-ում" (-um), da skouer:

համալսարանը (hamsalaranə: nominativel: "ar skol-veur") → համալսարանումը (hamalsaranumə: lokativel: "er skol-veur")

ճաշարան (tchacharan: nominativel: "un ti-debriñ") → ճաշարանում (chasharanum: lokativel: "en ti-debriñ")

Yezhoù turkek

Implijet e vez an droad lokativel gant yezhoù turkek 'zo, en o zouez an ouzbekeg hag an turkeg, da skouer:

• E turkeg, merket gant al lostger "-de/-te"/"-da/-ta":

elim ("ma dorn") → elimde ("em dorn")

Yezhoù finnek-ougrek

Implijet e vez an droad lokativel gant yezhoù finnek-ougrek 'zo, en o zouez ar samieg hag an hungareg, da skouer:

• E samieg Inari, merket gant al lostger "-st":

kyeleest ("er yezh")

kieđast ("en dorn")

• En hungareg, merket gant al lostger "-t/-tt)", implijet gant un nebeud anvioù kêrioù nemetken, implijet en degouezhioù all an droad inesivel pe an droad superesivel en e lec'h:

Győr (nominativel) → Győrött (pe inesivel: Győrben)

Pécs (nominativel) → Pécsett (pe troad superesivel: Pécsen)

amott ("el lec'h-hont" = "du-hont")

Yezhoù algonkek

Implijet e vez an droad lokativel gant ar yezhoù algonkek, da skouer:

• E montagneg (innu-aimun), merket gant al lostger "-(i)t":

shipu ("ster") → shipit ("er ster"/"war vord ar ster")

katshishkutamatsheutshuap ("skol") → katshishkutamatsheutshuapit ("er skol")

nuitsheuakan ("ma keneil") → nuitsheuakanit ("e ti ma c'heneil")

nipi ("dour") → nipit ("en dour")

utenau ("kêr") → utenat ("e kêr")

Levrlennadur

• Buck, Carl Darling (1933). Comparative Grammar of Greek and Latin. Chicago, Illinois : The University of Chicago Press.