Oasis
Oasis a oa ur strollad rock alternativel saoz savet e Manchester (Rouantelezh-Unanet) e 1991. Unan eus ar strolladoù rock brudetañ eo bet e dibenn ar bloavezhioù 1990. Oberiant eo bet betek e zisrann e 2009.
Istor
kemmañ
E 1991 e voe savet e Manchester ur strollad rock anvet The Rain gant Liam Gallagher (mouezh), Paul « Bonehead » Arthurs (gitar), Paul «Guigsy» McGuigan (gitar-boud) ha Tony McCarroll (taboulinoù). Buan a-walc'h e kinnigas Noel, breur Liam, mont er strollad, evel gitarour, sonaozer hag eil kaner. Hennezh en doa skrivet e-unan un nebeud kanaouennoù. Dibab a rejont adenvel ar strollad Oasis. E 1993 e sinjont ur gevrat gant al label Creation Records e 1993 ha kregiñ a rejont da enrollañ o albom kentañ, Definitely Maybe, a voe embannet e 1994. Berzh a reas kanaouennoù evel Supersonic, Live Forever pe Cigarettes and Alcohol. 150.000 skouerenn anezhañ a voe gwerzhet en tri devezh kentañ. Tony McCaroll a voe skarzhet eus ar strollad un tamm goude enrolladenn an albom. Alan White a gemeras e blas. Ur wagenn anvet Britpop, enni strolladoù evel Oasis, Blur pe Ocean Colour Scene, a aloubas gwagennoù radioioù Europa[1].
E 1995 e embannjont o eil albom, (What's The Story) Morning Glory ?, a zo gwelet gant lod evel oberenn wellañ ar strollad, ennañ kanaouennoù deuet da vezañ pezhioù klasel ar rock evel Wonderwall pe Don't Look Back In Anger. E barr e vrud e oa ar strollad pa embannas e drede albom, Be Here Now, e 1997.
E 1999 ez eas McGuigan hag Arthurs kuit eus ar strollad, da vare enrolladennoù an albom Standing on the Shoulders of Giants, embannet e 2000. Kemeret e voe o flas gant Gem Archer (gitar) hag Andy Bell (gitar-boud)[2]. Un albom live, Familiar to millions, a voe enrollet e miz Gouere 2000. Diskennet e oa gwagenn ar Britpop, ha ne rae ket kement a verzh ar strollad evit er bloavezhioù 1990. Heathen Chemistry (2002) a voe gwelet evel un albom izel e galite. Alan White a guitaas ar strollad e 2004, ha kemeret e voe e blas ouzh an taboulinoù gant Zak Starkey, mab ar Beatle Ringo Starr. Muioc'h a verzh a reas Don't believe the truth (2005).
Er festival Rock en Seine e 2009 e savas jeu etre an daou vreur Gallagher. Disrannet e voe ar strollad[3]. E miz Eost 2024 he deus embannet ar strollad e oa o vont da adseniñ asambles e 2025[4].
Diskografiezh
kemmañAlbomoù
kemmañ- Defintely Maybe (1994)
- (What's The Story) Morning Glory ? (1995)
- Be Here Now (1997)
- The Masterplan, dastumad tuoù B o singles kentañ (1998)
- Standing on the Shoulders of Giants (2000)
- Familiar to milions (2000, albom doubl enrollet da vare sonadeg ar 21 a viz Gouere 2000 e stad Wembley)
- Heathen Chemistry (2002)
- Don't believe the truth (2005)
Daveennoù
kemmañ- ↑ (fr) RAJON Florence, Oasis, Prélude et Fugue, dastumadeg Music Book, 1997, 127 p.
- ↑ (en) Oasis signs new bass guitarist (diellet), The Guardian, 13/11/1999
- ↑ (fr) Rock en Seine: Oasis annule et se sépare, Libération, 29/08/2009 (lennet d'ar 27/08/2024)
- ↑ (fr) Le groupe de rock britannique Oasis se reforme pour une tournée à l'été 2025, quinze ans après le clash entre les frères Liam et Noel Gallagher, France Info, 27/08/2024 (lennet d'ar 27/08/2024)