Sceilig Mhichíl

Sceilig Mhichíl (en iwerzhoneg), Skellig Michael pe c’hoazh Great Skellig (e saozneg), zo unan eus an div enezenn a ya d’ober enezeg Na Scealaga, en Iwerzhon. An hini vrasañ eus an div eo ha sevel a ra betek 230 metr dreist live ar mor.

Logelloù ar venec'h

An derezioù da bignat betek ar manati

Emañ Sceilig Mhichíl war-hed 15 km diouzh an douar-bras, er mervent da aod kontelezh Ciarraí. « Karreg Mikael » eo ster anv an enezenn. Didud eo, met e-pad 600 vloaz ez eus bet menec'h o chom enni, en ur manati pintet uhel tost da veg ar garreg.

Istor

Savet e oa bet ar manati kristen-se er VII^vet kantved. Lakaet eo bet war roll Glad ar bed gant UNESCO e 1996. Bez’ eo unan eus ar manatioù europat anavezetañ ha diaesañ da ziraez war un dro. En ur stad mat-eston eo chomet, dre m’eo bet dizarempred e-pad pell. Rust ha kalet e oa buhez ar benitiourien, a oa lojet e doare logelloù graet gant mein, anvet « clochán », savet tost d’ar vri.

Derezioù mein serzh a gas eus traoñ ar garreg betek ar manati. Eno ez eus c’hwech logell, daou beniti, 31 bez, ur groaz vaen hag un iliz eus an XIII^vet kantved, gouestlet da sant Mikael. Moarvat ne oa nemet un dousennad menec'h eno, gant un abad.

War-dro an XII^vet kantved moarvat e voe dilezet Sceilig Mhichíl ganto ha mont a rejont d’an douar-bras, da sevel manati Baile an Sceilg eno. Er XVI^vet kantved e krogas Sceilig Mhichíl da vezañ darempredet en-dro gant pirc’hirined a zeue di ur wech ar bloaz. En XIX^vet kantved e voe savet daou dour-tan war ar garreg. Unan anezho zo bet kempennet abaoe hag a vez implijet c’hoazh, met abaoe ar bloavezhioù 1980 n’eus gward ebet ennañ ken.

Loened

Ur gwarezva evned eo Sceilig Mhichíl, evel an enezenn all, Sceilig Bheag. Etrezo o-div e ro bod an inizi da niveroù bras a evned-mor, morskouled, sataniged, karamelled, torted, karaveged, ereved, godezed ha poc'haned.

Eus porzh Baile an Sceilg, war an douar-bras, ez eus bigi a gas an douristed d'an inizi, da vont da welet ar manati pe an evned-mor pe c'hoazh da besketa pe da splujañ er mor e-harz ar c'herreg.

Liammoù diavaez

• Skellig Michael (e saozneg)
• UNESCO World Heritage (e saozneg, galleg, arabeg, sinaeg, rusianeg, spagnoleg)
• Levr "The Forgotten Hermitage" (e saozneg)
• 360 Skeudennoù eus Sceilig Mhichíl