Eured

An eured (pe eureud) zo ur fest a vez graet en-dro da zimeziñ daou bried, a zo vont da vevañ er stad a briedelezh.

Daou baotr eureujet an eil d'egile e Toronto, Kanada

Ur plac'h nevez o skeiñ he zorkad bleunioù dreist he skoaz

Disheñvel eo an euredoù hervez ar broioù, ar pobloù, ar relijionoù, ha renk an dud er gevredigezh. E broioù zo e c'hoarvez an dimeziñ hervez lezenn a-raok deiz an eured, pa vez sinet ur baperenn hervez lezenn gant an daou bried nevez.

E Breizh, hervez ar c'hiz en Europa ar c'hornôg, e vez sinet ar baperenn ofisiel en ti-kêr da zeiz an eured, ha daou dest a vez o sinañ ivez.

Ar paotr-nevez a vez graet eus ar paotr o timeziñ, ar plac'h-nevez eus danvez e wreg. An dud-nevez a vez graet eus an daou bried.

Div lodenn a vez en eured eta : an dimeziñ, al lid a vez graet gant ur beleg er c'hevredigezhioù pe meteier relijiel, gant un den diveleg a-raok, pe war-lerc'h al lid relijiel, pe en e lec'h ; ar pred eured (anvet friko e Kerne-Izel) hag an diduamantoù a ya da-heul.

Eurediñ e brezhoneg

Gallout a ra ar re a c'houlenn, ma'c'h anavezont ur c'huzulier-kêr hag a zo brezhoneger a-walc'h, bezañ dimezet e brezhoneg, da lavarout eo klevout ur gaoz ofisiel e brezhoneg. An traoù ofisiel avat, ar paperioù, ne vezont nemet e galleg.
Gallout a reer eureudiñ e brezhoneg en iliz ivez, ma kaver ur beleg hag a oar brezhoneg.