Forseti

Forseti (norseg: Forseti "ar c'hadoriad") eo doue al lezenn hag ar gwir e gwengelouriezh lec'hlennat. Kadoriad ar Thing ("bodadenn veur") eo.

Forseti en e lez-varn (1881) gant Carl Emil Doepler

Gwengel

Forseti zo eus gouenn an Aesed, mab Balder ha Nanna. E annezlec'h eo an ti anvet Glitnir (pe Glastheim), lec'h ma vez laret ar varnerezh war oberennoù etre an doueed hag an dud gantañ. Dileuret eo evel penn-barner Asgard.

Arroudenn eus ar Grímnismál:

An dekvet eo Glitnir;
diazezet war peulioù aour
hag un doenn arc'hantet warnañ
Forseti a gadoria ennañ a-hed an deiz
O tiskoulmañ ar bec'hioù

Tyr eo doue ar stourm hag ar feulster, hag a zegas an daerijenn e kalon ar wersed, tra ma vez klasket un emglev gant Forseti kentoc'h. Evezhiet eo gantañ ha doujet e vez al lezennoù doueel en tiegezhioù hag er meuriadoù. Forseti, evel mab doue ar sklêrijenn, a varn ar wersed en ur zegas glanidigezh ouzhpenn ar peoc'h, da grouiñ un amzer nevez ha splann evit ar mare a heul.

Hervez testenioù ar sent Willebrord ha Ludger e oa en un enezenn un azeuldi e lec'h ma veze kehelet Forseti, anvet Fositesland. Soñjet e vez eo an enezenn Helgoland. Ur chatal sakr a beure du-hont hag e oa difennet o bosañ.

Levrlennadur

• Wolfgang Golther (1895). VII. Forseti. S. Hirzel. 386–390 p. 
• M. Tveitane: Art. Forseti. In: Reallexikon der germanischen Altertumskunde. Band 9: Fidel–Friedlosigkeit. 2., völlig neu bearbeitete und stark erweiterte Auflage. De Gruyter, Berlin / Boston 1995, ISBN 3-11-014642-8, S. 343–345.
• Jacob Grimm: Deutsche Mythologie. K. W. Schütz-Verlag, Coburg 2001, ISBN 3-87725-133-1.
• Rudolf Simek: Lexikon der germanischen Mythologie. Kröner, Stuttgart 2006, ISBN 3-520-36803-X.
• Wilhelm Jordan: Die Edda: Die heiligen Lieder der Ahnen. 2008, ISBN 3-86663-027-1.