Gwesbyr

Gwesbyr (skrivet ivez Gwespyr) zo ur gêriadenn e hanternoz Sir y Fflint, en arvor biz Kembre. Emañ etre Prestatyn er gornaoueg ha Ffynnongroyw er reter. Nepell en hanternoz emañ Talacre hag Y Parlwr Du. E kumuniezh Llanasa emañ.

Tiez e Gwesbyr.

Er gornaoueg d'ar gêriadenn emañ uhelennoù Bryniau Clwyd.

Hervez Ifor Williams e teu an anv Gwesbyr eus an anv-lec'h saoznek kozh West-bury, ar pezh a dalveze "kreñvlec'h ar gornaoueg". Evel meur a anv-lec'h er c'hornad, da skouer Prestatyn, Bagillt, pe Bistre, ez eo un anv saoznek hag a zo bet kembraekaet pa oa bet adaloubet ar vro gant Kembreiz d'ar mare angl-ha-saoz.

Mengleuzioù a oa er vro, a-gozh, ha brudet e oa mein Gwesbyr evel mein dispar da sevel tiez. Gant ar mein-se e voe savet tiez ar c'hornad, met ivez chapel Wenffrewi e Treffynnon, lodennoù eus kestell Rhuddlan ha Dinbych, iliz-veur Llanelwy, Abati Dinas Basing e Maes-glas...