Johannes von Wildeshausen
Johannes von Wildeshausen, anvet ivez Johannes Teutonicus, oa ul beleg dominikan, bet eo bet pevare mestr an urzh etre 1241 ha 1252.
Ganet eo bet war-dro 1180 Wildeshausen e-kichen Oldenburg e Saks-Izel en ur familh nobl. Aet eo da Anaon d'ar 4 a viz Du 1252 e Straßburg.
Studiet en deus e Bologna. Mignon oa gant an Impalaer Frederig II.
Degemeret e voe en urzh gant Domingo de Guzmán e Bologna e dibenn 1219 pe e penn kentañ 1220. Kaset e voe da brezeg brezel ar Groaz gant kannaded ar Pab Honorius III en Impalaeriezh Santel e 1224. Hanterour e voe ivez en un diemglev etre tud Stedingen hag eskob Bremen.
E penn Proviñs Hungaria e voe etre 1231 ha 1233. Anvet e voe Eskob Bosnia (lodenn eus Hungaria d'ar mare) e 1233 gant kannad ar Pab ar c'hardinal kisterkiat Giacomo da Pecorara evit kemer plas un eskob bet tennet e garg digantañ Chom a reas betek 1237.
Karget e voe gant ar Pab Gregor IX d'ur gefridi e-kichen Ivan Asen II, roue ar Vulgared.
E penn Proviñs Lombardia e voe etre 1238 ha 1240. Dilennet e voe Mestr an urzh e 1241 e Pariz.
Pemp yezh a gomze. Darempredoù mat en doa gant ar Guria. Kregiñ a reas da unvaniñ liderezh an urzh dominikan. Aesaat a reas ar studi hag ar prezegennerezh o tigeriñ skolioù e Köln, Montpellier hag Oxford hag o telc'her chabistroù meur e kêrioù disheñvel Europa (Köln e 1245, Montpellier e 1247, Trier e 1249, Londrez e 1250) o lakaat un harz da wir-miret Bologna ha Pariz.
| En e raok Raymond de Peñafort 1238-1240 |
Mistri Urzh ar Brezegerien | War e lerc'h Humbert de Romans 1254-1263 |