Pierre-Yves Moign

Pierre-Yves Moign, bet ganet e Brest d'ar 5 a viz Gwengolo 1927 hag aet da Anaon er memes kêr d'an 18 a viz Meurzh 2013, a oa ur sonaozour breizhat hag ur c'helenner war ar sonerezh.

E vuhez

Studiañ a reas e Skol-sonerezh Uhel Vroadel ("Conservatoire national supérieur de Musique" e galleg) Pariz. Ar c'hentañ priz piano ha kendonouriezh en doe e 1952.

E oberenn gentañ bet sonet ez-foran a voe sonerezh kentañ abadenn ar mimer Marcel Marceau e 1948.

Dedennet e oa gant ar sonerezhioù hengounel. Kenkrouer meur a strollad sonerezh eo bet : Son ha koroll e 1955 (teir fladenn e ti Barclay, un dro en Olympia), Kabalerien (meur a bladenn e ti ''Chant du Monde'' adalek 1961). Meur a droiad sonadegoù a reas ganto en Europa, abadanneoù skingomz ha skinwel ivez, betek 1972.

Adalek 1963 e studias pedagogiezh ar sonerezh ha dreist-holl an doareoù bev.

E dibenn ar bloavezhioù 1960 e krouas al laz-kanañ Hentou Breiz evit re yaouank. E 1978 e krouas Kreizenn Vreizhat an Arzoù Pobl ("Centre breton d'art populaire" e galleg) e Brest. Ren a reas anezhi betek 1999. Aozañ a reas abadennoù ha sonadegoù evel "Emgavioù Arzoù hengounel ha kevredigezh kempred" ha "Kroazhent ar broioù keltiek" ha kenstrivadegoù sonerezh e-leizh.

E keit-se e kendalc'has gant e labour sonaozañ. Skrivañ a reas evit kalzik lazioù-kanañ ha lazioù-seniñ. Kalz pezhioù a skrivas evit an delenn geltiek hag evit kelenn sonerezh. Da skouer, e Plougerne, e savas en un nebeud sizhunvezhioù "Dasson Breizh", ur rapsodienn evit laz-kerdin, haroe ha piano a voe sonet evit ar wech kentañ e miz Kerzu 1973 gant orkestr skol-sonerezh Brest.

Kemeret en deus perzh en orkestradur oberennoù Didier Squiban (ar sinfonienn Bretagne e 2000 hag ar sinfonienn Iroise e 2004).

Resevet en deus Kolier an Erminig e 2004.

Oberennoù

Evit unkanerien, laz-kanañ ha laz-seniñ

Gwerz Morvan (35'), war un destenn divyezhek (brezhoneg/galleg) gant Youenn Gwernig, Salaun ar Foll (25'), hag ur varzhoneg e galleg gant Paol Keineg (1981, kemennet gant an "Tombées de la nuit")

Evit laz-seniñ sinfonek

Légendaire pour le roi Arthur (16'), 1978 (kemennet gant Gouelioù Kerne)
Un den hag ar mor (15')
Gradlon meur ou Is la ville engloutie (16')

Evit lazioù-kerdin

Dasson Breizh (16')
Les heures de Rohan (90')

Sonerezh evit abadennoù c'hoariva

Mort avant l'aube (1948)
Gurvan gant Tangi Malmanche (1974)
Nomenoe-Oe ! Jakez Riou (1976)
Iseult Seconde Pêr-Jakez Heliaz (1979)
Le Barzaz Breiz (1975)

Sonerezh-kambr

Seizhad evit fleütoù, oboell, klerinell, saksell, korn, bason (1975)
Tri zamm berr evit pempad kouevrelloù
Teir barzhoneg kembreat evit 2 biano (1985)
Jenovefa, son-komedienn war divizoù savet gant Glenmor (1954)

Pezhioù evit telenn geltiek

An dro da selaou (1982)
Gwerz vihan (1983)

Dodenn hag argemmoù

Gwerz an Anaoun (1983)
Daou An Dro an eil war egile (1983)

Pladennoù

Son ha koroll, 1957, Barclay - 86030 et 86031
Chants Celtiques par Dunvel ar Benn, Chant du Monde - LDY 4217
Les ballets populaires de Rennes, Polydor - 45580
Les Kabalerien, Mouez Breiz hag Iroise - 1774 ATS
War hentou Breiz, Iroise - 30118

Abadennoù skinwel

Div abadenn produet gant France 3 :

Unan, e 1979, sevenet gant François Tajet
Unan, e 1985, sevenet gant Pêr ar Flao, war an Teir barzhoneg kembreat evit daou biano gant daou soner a Vreizh-Veur, Martin Jones ha Richard Mac Mahon.

Levrlennadur

Dictionnaire biographique du mouvement breton XX-XXIe siècles gant Lionel Henry, Yoran Embanner, 2013.
Pierre-Yves Moign, sonaozour, Goulc'han Kervella, Al Liamm, niv. 392, 2012