Álvaro Gestido

José Álvaro Pelegrín Gestido Pose pe Álvaro Gestido, bet ganet d'ar 17 a viz Mae 1907 e Montevideo (Uruguay) hag aet da Anaon d'an 18 a viz Genver 1957 e Santa Clara de Olimar (Treinta y Tres, Uruguay), a oa ur melldroader etrebroadel uruguayat (kreizer e bost dezhañ war an dachenn).

Álvaro Gestido e 1930
(ar c'hentañ en tu kleiz, en e sav)

An hini a veze graet El Caballero de Deporte, El Teniente pe Varito anezhañ a oa breur da Óscar Diego Gestido, prezidant Uruguay.

Chomet e oa da c'hoari, a-hed e vicher, en Uruguay :

• 1926-1942 : Peñarol Montevideo, aet da gampion e 1928, 1929, 1932, 1935, 1936, 1937 ha 1938.

C'hwec'h gwech warn-ugent en devoa douget krez La Celeste etre 1927 ha 1940, hep merkañ pal ebet.

C'hoarioù Olimpek hañv

Ezel e oa eus ar skipailh a yeas ar vedalenn aour gantañ da-geñver C'hoarioù Olimpek hañv 1928 (en Amsterdam, Izelvroioù).

Kib vell-droad ar bed

Kemeret en devoa perzh Álvaro Gestido en un dalc'h hepken :

• Kib vell-droad ar bed 1930 bet aozet en Uruguay ma oa aet ar maout gant skipailh broadel Uruguay. C'hoariet en devoa ar pevar c'hrogad eus ar genstrivadeg hag ezel e oa eus ar skipailh – Enrique Ballestrero, Ernesto Mascheroni‎, José Nasazzi, José Leandro Andrade, Lorenzo Fernández, Álvaro Gestido, Pablo Dorado, Héctor Scarone, Héctor Castro, José Pedro Cea, Victoriano Santos Iriarte – a c'hounezas (4-2) ar gourfenn ouzh hini Arc'hantina en Estadio Centenario (Montevideo) d'an 30 a viz Gouere 1930.