Broadelouriezh saoz
Eus ar Grennamzer d’an amzer vremañ
kemmañKemmet he deus ar vroadelouriezh saoz he neuz a-hed an istor :
- Adalek ar Grennamzer e voe techet ar rouaned saoz da astenn o beli war trobarzhioù keltiek Breizh-Veur hag enezeg an Inizi Predenek zoken. Pa ne oa ket graet kement-se e anv ar vreizhveuradelezh e kemere neuze ar vroadelouriezh saoz ur stumm impalaour
- Kempred gant eskoridigezh ar broadelouriezhioù keltiek, ha dreist-holl abaoe 1997 e kemmas krenn ar vroadelouriezh saoz he dremm : en en sevel a ra bremañ a-enep keal ar vreizhveuradelezh hag e c’houlenn evit Bro-Saoz gwirioù kevatal ha re Skos, Kembre ha Iwerzhon an Norzh.
Termenadur hag arouezioù ar vroadelouriezh saoz
kemmañ
En em termen a ra ar vroadelouriezh saoz evel ur santad ez eur Saoz a-raok bezañ Breizhveurad, pe Saoz hepken zoken. Aleze ar youl da lakaat arouezioù broadel Bro-Saoz war wel, evel :
- Banniel broadel Sant-Jord
- Lid Gouel broadel Jord, d’an 23 Ebrel
Arc’hadurioù politikel
kemmañE orin arc’haduioù ar vroadelouriezh saoz ez eo Kudenn Kornôg Lodainn : direizh e kav d’ar vroadelourion saoz e c’hallfe kannaded dilennet e Skos, Kembre pe Iwerzhon an Norzh kemer e Ti ar C'humunioù disentezioù arbennik a sell ouzh Bro-Saoz, pa ne c’hallont ket ar gannaded dilennet e Bro-Saoz kemer disentezioù kevatal a zo dindan veli Dael Skos, Bodadenn Vroadel Kembre pe Bodadenn Iwerzhon an Norzh : Goulenn a ra ar vroadelourion saoz eta, da vihanañ, ma vefe lakaet en e blom un Dael saoz emren. Lod anezho a c’houlenn zoken dizalc’hidigezh Bro-Saoz ha freuz ar Rouantelezh-Unanet. En em sevel a ra a-enep digreizennañ Gouarnamant Tony Blair war-zu 9 Rannbarzh e Bro-Saoz. A-enep dezho e tifenn diouzh un tu unded Bro-Saoz ha diouzh un tu all ar c’hontelezhioù hengounel.
Arvezioù ar vroadelouriezh saoz
kemmañArvezioù herverk zo ar vroadelouiriezh saoz :
- Peurvuiañ ez eo enepunanoureuropaour
- Peurvuiañ ez eo kentoc'h tuet war an tu dehoù, pa 'z eo ar broadelouriezhioù keltiek war an tu kleiz (pezh a zo gwir evit da vihanañ Mebyon Kernow e Kernev-Veur ha Plaid Cymru e Kembre ; n'eo ket ken anat evit SNP e Skos ha Sinn Féin e Iwerzhon).
- Ez-damkanel n'int ket an darempredoù gant ar broadelouriezhioù keltiek dislavarus. Kement-se zo splann evit ar broadelouriezhioù skosat hag iwerzhonat. Diasterioù zo gant ar vroadelouriezh gembreat, pa embann ar vroadelourion saoz ez eo Sir Fynwy ul lodenn eus Bro-Saoz. Dislavarus-krenn eo ar vroadelouriezh saoz gant ar vroadelouriezh gerneveurat, pa gav d'ar vroadelourion saoz ez eo Kernev-Veur ul lodenn ivez eus o bro, daoust ma touj Strollad Rannvroelour Wessex ouzh dibarded Kernev-Veur.
Sontadegoù a-zivout santad ar bobl saoz
kemmañ| Evit un Dael saoz emren | Evit Dizalc'hidigezh Bro-Saoz | |
| Gouere 2006 | 41 % | 31 % |
| Du 2006 | 68 % | 48 % |
Mammennoù :
41 % : Sontadeg MORI diwar goulenn Strollad an Demokrated Saoz ha ar Stourmadeg evit un Dael Saoz
31 % : Sontadeg ICM Omnibus diwar goulenn an aozadur enklaskoù skosat Progressive Partnership
68 % ha 48 % : Sontadeg ICM diwar goulenn ar Sunday Telegraph
An Aozadurioù
kemmañAozadurioù liesseurt a stourm evit gwirioù Bro-Saoz, a c'hall bezañ :
- Strolloù-pouezañ, evel ar Stourmadeg evit un Dael Saoz emren pe an Emglev Bonreizhel saoz
- Strolladoù politikel, evel Strollad an Demokrated Saoz dreist-holl, hogen ivez stolladoù bihanoc'h evel Strollad Bro-Saoz Dieub