Ferdinand Iañ an Impalaeriezh Santel

Ferdinant Iañ Habsbourg, impalaer Alamagn, ganet e 1503 en Alcala de Henares e Kastilha, ha marvet d'ar 25 a viz Gouhere 1564 e Vienna (Aostria), a voe

• arc'hdug Aostria en 1520 (pa oa 17 vloaz),
• roue Hungaria ha roue Bohemia en 1526 (pa oa 23 bloaz),
• dilennet da roue ar Romaned en 1531 (pa oa 28 vloaz),
• anvet Impalaer roman santel gant e vreur henañ Karl V, pa zilezas ar galloud (16 a viz Genver 1556); 53 bloaz e oa neuze, met ne voe dilennet nemet d'ar 24 a viz Meurzh 1558.

Ferdinand e 1531, er bloavezh ma voe dilennet da Roue ar Romaned

Ferdinand Iañ an Impalaeriezh Santel, poltredet gant Hans Bocksberger.

Taol Ferdinand Iañ eFrankfurt en 1558

E vuhez

Mab e oa da Fulup Iañ Kastilha ha da Juana de Castilla, rouanez Spagn, ha breur e oa da Karl V. Kemer a reas, war-lerc'h e vreur henañ, kurunennoù Aostria, Stiria, Hungaria, ha re all c'hoazh, a oa peadra an Habsbourged, ha goude, pa voe en em dennet Karl, e voe lakaet e penn an Impalaeriezh santel roman german. Eñ an hini a grogo lignez Habsbourged Aostria, pe Habsbourged Vienna.

Roue Bohemia ha Hungaria e teuas da vout en 1526, war-lerc'h marv ar roue Loeiz II Hungaria, e vreur-kaer, ha dilennet e voe da Roue ar Romaned en 1531, ha diwezhatoc'h e voe anvet da Impalaer pa guitaas e vreur Karl ar galloud e 1556. Nac'h a reas ar pab Paol IV e anavezout evel impalaer an Impalaeriezh Santel Roman German dre ma ne oa ket bet goulennet ali ar Sez-Santel nag evit e zilennidigezh nag evit dilez Karl V. Nac'h a eure Ferdinant e oa ezhomm eus an asant-se ha diwar neuze ne voe ket goulennet asant ar pab ken gant an impalaerien santel. Sioul ha peoc'hus e voe e ren ha klask a reas lakaat katoliked ha protestanted d'en em glevout.

D'ar 25 a viz Mae 1521 e timezas e Linz , en Aostria, da Anna Jagellon (1503-1547), merc'h pennhêrez Vladislas II Hungaria, a oa roue Bohemia ha roue Hungaria, dimezet da Anna Foix. Kenkent ha deroù e ren en Kroatia, Hungaria ha Bohemia, levezonet gant e guzulierien alaman a oa ampart war ar gwir roman, e kendalc'has Ferdinant gant e bolitikerezh kreizennañ.

Nevezintioù

Meur a nevezinti a zegasas:

• goprañ ar gargidi gant arc'hant, han'eo ket gant reiñ douaroù dezho;
• dispartiañ an aferioù arc'hant diouzh re ar politikerezh hagar justis
• kenvererezh ha kenevezhierezh etre ar galloudoù evit ma'zafe gwelloc'har melestradur en-dro.

E vugale

Ur ribitailh bugale, 15 en holl, o doe Ferdinant hag Anna Bohemia ha Hungaria, ha dre o dimeziñ e kasas an impalaer e bolitikerezh, en sell da greskiñ e c'halloud.

• Elisabeth (1526-1545)
  • a zimezas e 1543 da Sigismund II Aogust, roue Pologn ;
• Masimilian II an Impalaeriezh Santel (1527-1576), a renas war e lerc'h,
  • dimezet e 1548 da Maria Spagn (1528-1603)
• Anna (1528-1590)
  • a zimezas e 1546 da Alberzh V (1528-1579) dug Bavaria (1)
• Ferdinand (1529-1595), arc'hdug Tirol a zimezas div wech
  • en 1557 da Philippine Welser (1527-1580)
  • en 1582 da Anna Caterina Gonzaga (1529–1595), merc'h da Guglielmo Gonzaga, dug Mantova
• Maria Aostria (1531–1581),
  • dimezet en 1546 da Wilhelm von Kleve Dug Jülich, Dug Kleve ha Dug Berg (1516-1592).
• Magdalena (1532–1590), leanez en Hall in Tirol
• Katharina (1533–1572), dimezet div wech
  • e 1549 da Francesco III Gonzaga (1533–1550) dug Mantova
  • e 1553 da Sigismund II Aogust (1520–1572) Roue Pologn, intañv he c'hoar Elisabeth ;
• Eleonora (1534-1594)
  • dimezet da Guglielmo Gonzaga (1538-1587), dug Mantova ha Montferrato
• Margarethe (1536–1566), leanez en Hall in Tirol
• Johann (1538–1539)
• Barbara (1539-1572) (1539–1572)
  • dimezet e 1565 da Alfonso II d'Este (1533–1597), dug Ferrara;
• Karl II Aostria (1540-1590)
  • a zimezas e 1571 da Maria Anna Bavaria (1551-1608) (1)
• Ursula (1541–1543)

1. Helena (1543–1574), leanez e Hall in Tirol

• Johanna (1547-1578)
  • a zimezas en 1565 da Francesco de' Medici (1541-1587), Dug-meur Toskana ; hi an hini a oa mamm d'ar rouanez c'hall Maria de' Medici