Llanilltud Fawr

Llanilltud a zo ur gêr vihan e kreisteiz Kembre, e Morgannwg, war aod Mor Hafren. Saoznekaet eo bet an anv e Lantwit Major.

Orin hag istor

Dont a ra an anv eus ar manac'h Illtud, aet da Ildud e brezhoneg, a voe savet ur manati gantañ eno, war-dro ar VI^vet kantved. Ennañ e voe desket tud veur an Iliz katolik, tud deuet da vezañ, darn anezhe, sent veur Breizh, ha dreist-holl renerien an divroadeg etrezek Arvorig.

Desket e voe eno ar Vrezhoned-mañ:

Sant Padrig a zeuy da vout sant meur Iwerzhon,
menec'h a yeas da Gerne-Veur evel
- Sant Pedrog (a voe savet gantañ Padstow e Kernev-Veur),
- Sant Nektan,
- Santez Morwenna (a voe savet ganti Morwenstow e Kernev-Veur),
- Sant Piran a zo sant paeron Kernev-Veur;
ar re a zivroas da Arvorig Paol Aorelian, Samzun, Gweltaz, Tudwal (pe "Tugdual");
Dewi, pe Dewidd, sant paeron Kembre;
ar roue Maelgwn Gwynedd.

Darn a zo aet betek ober eus ar manati-se "koshañ skol-veur ar bed".

Pa zegouezhas menec'h alese da Arvorig e voe roet gante anv o manati d'al lec'h ma oant degouezhet (gwelout Lannildud). Koulskoude ne greder ket e oa Illtud en o zouez.

Da welout eno

Diskouezet e vez d'ar weladennerien:

an iliz eus an XII^vet kantved gouestlet da Sant Illtud, savet el lec'h m'edo ar manati kozh;
an ti-kêr eus ar XV^vet kantved,
kastell Sant Donat (kembraeg: castell Sain Dunwyd) a chom tammoù anezhañ eus an XII^vet kantved, a zo hiriv ur skol etrevroadel anvet, Atlantic College.