Pedro Iañ Brazil

• Ur pennad Pedro de Portugal zo.

Pedro Iañ Brazil, pe Pedro IV Portugal, pe Pedro de Alcântara Francisco António João Carlos Xavier de Paula Miguel Rafael Joaquim José Gonzaga Pascoal Cipriano Serafim de Bragança e Bourbon (1798-1834), a oa roue Portugal hag Impalaer Brazil.

Pedro IV Portugal a oa ivez Pedro Iañ Brazil

Pedro Iañ o sevel an Hino Nacional (hiziv Hino da Independência), e 1822. Livet gant Augusto Braga.

E vuhez

Ar priñsig Pedro, pa oa daou vloaz. Poltred gant Augustin Esteve, war-dro 1800.

E yaouankiz

Mab e oa da João VI (1767-1826), roue Portugal ha Brazil, ha d'e bried, an infantez spagnol Carlota Joaquina de Borbón (1775-1830). Infant Portugal e oa, hag anvet e voe da Briñs Beira en 1801 pa varvas e vreur henañ, an infant Antonio (1795-1801), rak an titl-se a veze roet da eil pennhêr ar gurunenn e Portugal.

E dibenn miz Du 1807 e voe aloubet Portugal gant armeoù gall an impalaer Napoleon Iañ, ma rankas an tiegezh roueel hag al lez lestrañ da vont d'an harlu da Vro-Vrazil. D'ar 7 a viz Meurzh 1808 e tegouezhjont e Rio de Janeiro, hag eno e voe diazezet gouarnamant Portugal.

Dieubet e voe Portugal en 1811, ha lamm a voe roet da Napoleon en 1815 e Waterloo, ha koulskoude e chomas an Tiegezh Bragança e Brazil, ma teuas an drevadenn da vezañ rouantelezh en 1815, ha krouet neuze Rouantelezh unanet Portugal, Brazil hag an Algarvoù.

En 1816 e varvas e vamm-gozh, ar rouanez Maria Iañ Portugal (1734-1816), hag anvet e voe he mab João VI da roue, ha Pedro, ar mab-bihan, da zug Bragança ha da briñs Brazil.

Un dispac'h a c'hoarvezas e Porto en 1820 avat, ma rankas an darn vrasañ eus tud an tiegezh distreiñ da Europa en Ebrel 1821. A-raok mont di e laoskas ar roue João, tad Pedro, rejañs Brazil gant e vab.

E Brazil

N'eo nemet e 1821 e tistroas João VI da Bortugal, goude leuskel e vab Pedro e Brazil evel rejant. D'an 13 a viz Mae 1822 e voe embannet gant kuzul-kêr Rio de Janeiro e oa Pedro difenner ha gwarezour hollbad Brazil.

D'ar 7 a viz Gwengolo 1822, e São Paulo, ec'h embannas ar rejant Pedro dizalc'hted Brazil, ha d'an 12 a viz Here (en deiz ma tapas e 24 bloaz) e leurgêr Santana e Rio de Janeiro, e teuas da vout impalaer Brazil evel Pedro I^añ. Kurunennet e voe er gêr-se d'ar 1añ a viz Kerzu 1822.

Pa varvas e dad e teuas da vout Pedro IV, roue Portugal hag an Algarvoù d'an 10 a viz Meurzh 1826.

D'ar 17 a viz Here 1829, e Rio de Janeiro, ec'h addimezas Pedro gant Amélie von Leuchtenberg (1812-1873) (merc'h da Eugène de Beauharnais).

Dimezioù

Div wech e timezas:

• d'ar briñsez aostrian Maria Leopoldine Aostria (1797-1826).
• d'ar briñsez gall-italian-alaman Amélie von Leuchtenberg (1829–1831), dugez Leuchtenberg ha Bragança.

E vugale

18 bugel en doe Pedro.

Digant e bried kentañ, Maria Leopoldine Aostria, Arc'hdugez Aostria:

• Maria II Portugal, rouanez Portugal (1819-1853), dimezet div wech:
  • da Auguste de Beauharnais, dug Leuchtenberg,
  • da Fernando de Saxe-Coburgo-Gota, roue-kenseurt Portugal;
• An Infant Miguel de Bragança, Priñs Beira (1820);
• An Infant João Carlos, Priñs Beira (1821–1822);
• Januária Maria de Bragança (1822–1901)
• D. Paula Mariana (1823–1833);
• D. Francisca (1824–1898)
• Pedro II Brazil (1825–1891),
  • dimezet da Teresa Cristina Maria de Bourbon, priñsez an Div Sikilia.

Pedro II Brazil pa oa bihanik.

Digant e eil pried Amélie von Leuchtenberg, impalaerez Brazil (1829–1831), dugez Leuchtenberg ha Bragança:

• Maria Amélia de Bragança (1831–1853), priñsez a Vrazil.

Gant e serc'h, Domitília de Castro e Canto Melo, markizez Santos:

• ur mab (1823), ganet marv;
• Isabel Maria de Alcântara Brasileira (1824–1898), dugez Goiás, dimezet da Ernesto José João Fischler von Treuberg, kont Treuberg;
• Pedro de Alcântara Brasileiro (1825–1826);
• Maria Isabel de Alcântara Brasileira (1827–1828), dugez Ceará;
• Maria Isabel II Alcântara Brasileira (1830–1896), dimezet da Pedro Caldeira Brant, kont Iguaçu.

Gant ar C'hallez Noémi Thierry :

• Pedro, marvet a-raok e zaouzek miz;
• Ur verc'h, marvet a-raok he daouzek miz;.

Gant Maria Benedita de Castro Canto e Melo, baronez Sorocaba ha c'hoar da marquesa de Santos:

• Rodrigo Delfim Pereira.

Gant an Uruguayadez María del Carmen García en doe ur bugel ganet marv.

Gant e serc'h c'hall Clémence Saisset :

• Pedro de Alcântara Brasileiro.

Digant al leanez portugalat Ana Augusta Peregrino Faleiro Toste (vila de São Sebastião, 1809 - Angra) en doe ur mab all, anvet Pedro (1832 pe 1833), a vije chomet bev betek an oad a 4 pe 5 bloaz.