Polyksene (e gregach Πολυξένη / Polyxénê) a oa ur briñsez eus kêr Troia, merc'h d'ar roue Priamos ha d'e eil pried Hekabe hervez mojennoù Hellaz kozh.

Polyksene aberzhet
Marv Polyksene e levr Boccaccio De mulieribus claris

Kaoz ebet ne gaver anezhi en Ilias Homeros. Savet eo bet ar vojenn gant barzhed all diwezhatoc'h.

Ar vojennAozañ

Merc'h yaouankañ he zud e oa Polyksene. Gwelet eo evel adskeudenn Ifigeneia, merc'h Agamemnon ha Klytaimnestra. Div wreg en doe he zad, ha meur a serc'h. Hanter-kant breur hag unnek c'hoar eta he doe Polyksene, en o zouez Hektor a oa mab henañ Priamos ha pennhêr tron Troia. Paris, ur mab all, a lakaas brezel Troia da ziwan. E-touez bugale Priamos hag Hekabe e kaver Helenos ha Kassandra; Deifobos; Troilos; Polites; Kreousa, gwreg Aineias; Laodike, gwreg Helikaon; ha Polydoros, e vab yaouankañ.

Hervez un orakl ne vije ket distrujet Troia ma teuje he breur Troilos da dapout e ugent vloaz. Arsailhet e voe ar breur hag ar c'hoar gant soudarded hellazat, pa oant o vont da gerc'hat dour d'ur feunteun. Lazhet e voe Troilos gant ar brezelour Ac'hilleüs. Orgediñ ouzh Polyksene a reas neuze an Hellazad, a voe lazhet er brezel, goude dezhañ lazhañ Hektor, breur henañ Polyksene.

 
Marv Polyksene dre zaouarn Neoptolemos.

Lazhet e voe Polyksene gant Neoptolemos, mab da Ac'hilleüs, war bez e dad.

MammennoùAozañ

Istor aberzh Polyksene a gaver en Hekabe ha meneget eo ivez en Troianed, div oberenn diwar zorn Euripides.[1]


NotennoùAozañ

  1. Euripides: The Trojan Women; Skrid e saozneg e Wikisource.